Read Dikateny Iombonana Eto Madagasikara Salamo 132 Bible Online

Salamo 132 - Dikateny Iombonana Eto Madagasikara bible

Salamo 132

¹Hira fiakarana. TOMPO ô, ny zavatra rehetra niaretan’i Davida dia mba tsarovy hanasoavanao azy.

²Tsarovy fa taminao, TOMPO ô, no nanaovany fianianana; taminao, ry ilay Maherin’i Jakôba, no nanaovany voady hoe:

³«Tsy hiditra ny tranolay fonenako aho na hiakatra ny farafara fandriako,

⁴tsy hamela ny masoko hatory aho na ny hodi-masoko ho rendremana,

⁵mandra-pahitako toerana ho an’ny TOMPO, dia fonenana ho an’ilay Maherin’i Jakôba.»

⁶Indro henonay hoe any Efratà[347] ny Vatamasina[348]; ary hitanay tao amin’ny sahan’i Jahara[349].

⁷«Koa ndeha isika ho any amin’ny fonenan’ny Tompo sy hiankohoka eo anoloan’ny fitoeran-tongony[350]!

⁸Avia, TOMPO ô, ho amin’ny toeram-pitsaharanao, dia Ianao sy ilay Vatamasina maneho ny herinao.

⁹Aoka ny mpisorona hitafy fahamarinana, ny mpivavaka aminao hihoby an-kafaliana!

¹⁰Noho ny amin’i Davida mpanomponao, dia aza lavina ity mpanjaka voahosotrao[351].»

¹¹Ny TOMPO efa nanao fianianana tamin’i Davida ka tsy hivadika amin’ny marina voalazany hoe: «Iray amin’ireo zanakalahinao no hataoko mpanjaka handimby anao amin’ny sezafiandriananao.

¹²Raha ny zanakao mitandrina ny fanekempihavanako mbamin’ny fepetra izay hampitaiko aminy, dia zanany lahy hatrany hatrany koa no hipetraka eo amin’ny sezafiandriananao[352].»

¹³Ny TOMPO efa nifidy an’i Tsiôna, izay tiany hatao fonenana.

¹⁴«Intỳ, hoy Izy, no toeram-pitsaharako hatrany. Eto no honenako! Eny, eto no tiako!

¹⁵Hotahîko tokoa i Tsiôna, homeko ny sakafo hivelomany; hataoko voky hanina ireo mahantra ao aminy.

¹⁶Ny mpisorony hotafîko famonjena, ny mpivavaka hanao hobin-kafaliana.

¹⁷Ao no hataoko mpanjaka mahery ny solofo iray avy amin’i Davida; ary ho toy ny fanilo maharitra izany mpanjaka voahosotro izany[353].

¹⁸Ny fahavalony hotafîko henatra, fa fehiloha manjelatra kosa no eo aminy.»