Read Dikateny Iombonana Eto Madagasikara Salamo 135 Bible Online

Salamo 135 - Dikateny Iombonana Eto Madagasikara bible

Salamo 135

¹Haleloià! Miderà ny anaran’ny TOMPO ianareo. Miderà Azy ianareo mpanompony

²izay mitoetra ao an-tranony, ao an-kianjan’ny tranon’Andriamanitsika.

³Miderà ny TOMPO ianareo fa tsara Izy; mankalazà ny anarany fa mamy izany,

⁴satria i Jakôba nofidîn’ny TOMPO ho Azy ary i Israely natokany ho fananany.

⁵Eny, fantatro fa lehibe ny TOMPO; ary ekeko fa izany Tompontsika izany dia ambonin’ny andriamanitra rehetra.

⁶Izay sitraky ny TOMPO, ataony avokoa na any an-danitra na etỳ an-tany, na any an-dranomasina sy any an-drano lalimbe.

⁷Nampiakatra rahona avy any am-paran’ny tany Izy, ka nanao helatra narahin-dranonorana ary namoaka ny rivotra avy tamin’ny fitahirizany azy.

⁸Namely ny lahimatoan’ny Ejiptianina Izy, hatramin’ny olombelona ka hatramin’ny biby[356].

⁹Famantarana sy zava-mahagaga no nalefany teo anivonao, ry Ejipta, mba hanafaizana ny Farao sy ireo mpanompony rehetra[357].

¹⁰Namely hafa firenena maro Izy sy nahafaty mpanjaka mahery,

¹¹dia i Sihôna mpanjakan’ny Amôrita sy i Hôga mpanjakan’i Basàna[358], ary namely ny fanjakana rehetra izay manerana an’i Kanahàna.

¹²Ny tanin’ireny nomeny ho lova, ho lovan’i Israely vahoakany.

¹³TOMPO ô, maharitra mandrakizay ny lazanao; amin’ny taona rehetra ny fahatsiarovana Anao,

¹⁴satria omenao rariny ny vahoakanao ary iantranao indray ny mpanomponao.

¹⁵Ny sampin’ny hafa firenena dia volafotsy amam-bolamena; zavatra notefen’olombelona ireny.

¹⁶Manam-bava fa tsy miteny; mana-maso fa tsy mahita;

¹⁷manan-tsofina fa tsy mandre; tsy misy fofonaina akory ao am-bavany.

¹⁸Ho tahaka azy anie izay nanao azy sy izay rehetra mitoky aminy[359]!

¹⁹Ry fokon’i Israely ô, misaora ny TOMPO; ry taranak’i Aharôna[360] ô, misaora ny TOMPO;

²⁰ry tariky ny levita ô, misaora ny TOMPO; ry mpanaja ny TOMPO ô, misaora ny TOMPO.

²¹Hisaorana avy ao Tsiôna anie ny TOMPO, Izay monina ao Jerosalema! Haleloià!