Read Dikateny Iombonana Eto Madagasikara Salamo 140 Bible Online

Salamo 140 - Dikateny Iombonana Eto Madagasikara bible

Salamo 140

¹Tao amin’ny tahirin-kiran’ny filohan’antoko-mpihira. Salamo nataon’i Davida.

²TOMPO ô, vonjeo ho afaka amin’ny olon-dratsy aho ary arovy tsy ho azon’ny olon-dozabe

³izay misaina haratsiana ao am-pony ka manangana ady isan’andro vaky.

⁴Toa mandrani-dela hanindrona tahaka ny bibilava ireo, toa poizi-menarana ny teny avoakan’ny vavany[373]. Fiatoana

⁵TOMPO ô, ambeno tsy ho voatanan’ny olon-dratsy aho, arovy tsy ho azon’ny olon-dozabe izay nihevitra handronjina sy hamotraka ahy.

⁶Efa nanafim-pandrika hamelezana ahy ny mpiavonavona: eny, nanenjan-tady sy harato teo amoron-dalana ireo ary nametraka tadivavarana mba hahazoany ahy. Fiatoana

⁷Hoy kosa aho tamin’ny TOMPO: «Ianao no Andriamanitro. TOMPO ô, mba henoy izany feoko mitaraina aminao!

⁸Ry TOMPO Andriamanitra Mpamonjy mahery ô, nosaronanao ny lohako tamin’ny andro niadiana.

⁹TOMPO ô, aza tovinao izay irîn’ny olon-dratsy, aza avela hahomby ny fikasany!» Fiatoana

¹⁰Be rehaka lalandava ireo fahavalo manemitra ahy; ka ny ratsy notonontononiny anie hanototra azy!

¹¹Vainafo miredareda anie no toy ny orana halatsaka aminy; lavaka lalina tsy hainy hiakarana anie no hamarinana azy ao anaty afo!

¹²Aoka ny olo-mahay vava tsy honina amin’ny tany, ary ny olon-dozabe hoenjehin’antambo ka tsy hamelany!

¹³Fantatro, TOMPO ô, fa hotandrovinao ny zon’ny ory ary hamoahanao fitsarana ara-drariny ny mahantra.

¹⁴Eny tokoa, ny olo-marina hisaotra Anao ary ny olo-mahitsy hitoetra eo anoloanao.