Read Dikateny Iombonana Eto Madagasikara Salamo 143 Bible Online

Salamo 143 - Dikateny Iombonana Eto Madagasikara bible

Salamo 143

¹Salamo nataon’i Davida. TOMPO ô, mba henoy vavaka aho, anongilano sofina ny fifònako. Araka ny toetranao mahatoky sy araka ny fiantrànao no amalio ahy.

²Mpanomponao aho ka aza antsoina hotsaraina, fa tsy misy olombelona ho marina eo anatrehanao[377].

³Nenjehim-pahavalo tokoa aho; nohoseny an-tany ny aiko. Nampitoeriny tamin’ny haizina aho mova tsy ny maty fahagola.

⁴Koa reraka ato anatiko aho; fadiranovana ny foko ato amiko.

⁵Tsaroako izany andro fahiny; sainiko avokoa ny nataonao, eritreretiko ny asa vitanao.

⁶Mivavaka manandra-tanana aminao aho[378]; ny fanahiko eo anatrehanao dia tahaka ny tany mangentana. Fiatoana

⁷Valio faingana aho, TOMPO ô, fa efa ambivitra ny aiko. Aza manafin-tava amiko Ianao, ndrao ho tahaka izay midina any am-pasana aho.

⁸Ataovy tsapako isa-maraina ny fitiavanao, satria Ianao no itokiako; ampahafantaro ahy ny lalan-kizorako, satria Ianao no ifantohako.

⁹TOMPO ô, afaho amin’ny fahavalo aho fa ao aminao no iereko.

¹⁰Ampianaro aho hanao ny sitrakao, satria Andriamanitro Ianao. Enga anie ny Fanahinao tsara hitarika ahy amin’ny tany marina!

¹¹Araka ny maha TOMPO Anao, dia velomy indray aho; noho ny fahamarinanao, dia esory amin’ny fahoriana aho.

¹²Noho ny fitiavanao ahy, dia fongory ny fahavaloko ka aringano avokoa ny mpandrafy ahy, satria mpanomponao aho.