Read Dikateny Iombonana Eto Madagasikara Salamo 144 Bible Online

Salamo 144 - Dikateny Iombonana Eto Madagasikara bible

Salamo 144

¹Nataon’i Davida. Hisaorana anie ny TOMPO vatolampiko, Ilay manazatra ahy hamely fahavalo sy manomana ahy hiady amin’ireo!

²Izy no fialofako sy fonena-mimandako fiarovana avo sy mpanafaka ahy. Izy no ampingako sy fiereko, mampietry firenena maro[379] hanoa ahy.

³TOMPO ô, mba inona moa ny olombelona no ahînao sy izay zanak’olombelona no karakarainao?

⁴Fa ny olombelona toa tsio-drivotra ihany; ny androm-piainany toa aloka mihelina[380].

⁵TOMPO ô, mba aletseo ny lanitra ka midîna; tendreo ny tendrombohitra hanetona.

⁶Ataovy mitselatselatra ny helatra hipariaka; alefao ny zana-tsipîkanao hifanaretsaka.

⁷Ny tananao atsory avy any ambony mba hisarika ahy ho afaka amin’ny ranobe, dia amin’ny famelezan’ny hafa firenena,

⁸izay miteny fitaka ny vavany ary fianianana tsy marina no anandratany tanana ankavanana.

⁹Andriamanitra ô, hihirako hira vaovao Ianao ary hankalazaiko amin’ny valiha torifolo:

¹⁰«Ianao no manome fandresena ny mpanjaka sy manafaka an’i Davida mpanomponao.»

¹¹Vonjeo tsy ho voan’ny sabatry ny olon-dratsy[381] aho, afaho amin’ny famelezan’ny hafa firenena, izay miteny fitaka ny vavany ary fianianana tsy marina no anandratany tanana ankavanana

¹²Ny zanakay lahy anie ho toy ny zana-kazo: toy ny hazo tanora maroroka fitsiry! Ny zanakay vavy anie ho toy ny andry fehizoro, izay tsara sokitra toy ny any an-dapa!

¹³Ny sompitray anie ho feno hika, ho hipoka vokatra isan-karazany! Ny biby fiompy any an-tsahanay anie hitombo arivoarivo sy alinalina!

¹⁴Ny mpiandany aminay no hizaka ny mafy, ka ny mandanay anie tsy hisy banga! Samy tsy hisy koa na ny faharesena na ny fibabababàna eny an-kianja!

¹⁵Sambatra ny firenena izay hahazo fanambinana toy izany! Sambatra ny firenena izay manana ny TOMPO ho Andriamanitra!