Read Dikateny Iombonana Eto Madagasikara Salamo 145 Bible Online

Salamo 145 - Dikateny Iombonana Eto Madagasikara bible

Salamo 145

¹Fiderana nataon’i Davida. Andriamanitro ô[382], Ianao no mpanjakako ka dia hanandratra Anao aho sy hankalaza ny anaranao mandrakizay.

²Hankalaza Anao isan’andro aho sy hidera ny anaranao mandrakizay.

³Lehibe ny TOMPO ary mendri-piderana fatratra; tsy takatry ny saina ny halehibiazany.

⁴Ny taranaka rehetra samy hilaza amin’izay mandimby azy ny fiderana ny zava-bitanao sy hanambara ny asanao mahery.

⁵Ny fiandriananao malaza sy be voninahitra mbamin’ny asanao mahagaga no hosaintsainiko;

⁶hotenenin’ny olona anie ny herinao mahatahotra, fa hotanisaiko kosa ny halehibiazanao!

⁷Aoka izy hiventy fahatsiarovana ireo asa soa lehibe nataonao ary hihoby ny fahamarinanao!

⁸Miantra sy be indrafo ny TOMPO, tsy malaky tezitra ary be fitiavana[383];

⁹tsara amin’ny olon-drehetra ny TOMPO, be indrafo amin’ny asany rehetra.

¹⁰TOMPO ô, midera Anao ny asanao rehetra; misaotra Anao ny mpivavaka aminao.

¹¹Resahiny ny fanjakanao be voninahitra ary teneniny ny asanao mahery

¹²mba ho fantatry ny olona ny asanao mahery sy ny fanjakanao be voninahitra sy malaza.

¹³Fanjakana maharitra mandrakizay ny fanjakanao; amin’ny taona mifandimby ny fanapahanao. Mahatoky amin’ny fampanantenàny rehetra ny TOMPO ary be fitiavana amin’ny asany rehetra[384].

¹⁴Ny TOMPO no manohana izay rehetra ho lavo sy mampitraka izay rehetra mitanondrika.

¹⁵Mifantoka aminao ny mason’izao rehetra izao fa Ianao manome azy ny sakafony ara-potoana.

¹⁶Manokatra ny tananao Ianao ka mamoky zava-tsoa ny miaina rehetra[385].

¹⁷Marina amin’ny lalany rehetra ny TOMPO ary be fitiavana amin’ny asany rehetra.

¹⁸Ny TOMPO eo akaikin’izay rehetra miantso Azy, dia izay rehetra miantso Azy marina tokoa.

¹⁹Manao izay irîn’ny manaja Azy ny Tompo, ary mihaino ny tarainany ka mamonjy azy.

²⁰Ny TOMPO miambina izay rehetra tia Azy; ny olon-dratsy kosa aringany avokoa.

²¹Aoka ny vavako hiteny fiderana ny TOMPO; ny voaary rehetra anie hankalaza ny anarany masina mandrakizay mandrakizay!