Read Dikateny Iombonana Eto Madagasikara Salamo 18 Bible Online

Salamo 18 - Dikateny Iombonana Eto Madagasikara bible

Salamo 18

¹Tao amin’ny tahirin-kiran’ny filohan’antoko-mpihira. Hira nataon’i Davida mpanompon’ny TOMPO. Notononiny hanomezam-boninahitra ny TOMPO ireto teny ireto fony izy nafahany tamin’ny fahavalony rehetra, indrindra tamin’i Saoly.

²TOMPO ô, tiako Ianao fa Ianao no heriko!

³Ny TOMPO no harambato fierena azo antoka ho ahy. Izy no Andriamanitro sy vatolampy ialofako, ampinga fiarovana sy mpamonjy mahery ho ahy.

⁴Hoderaina anie ny TOMPO! Fa niantso Azy aho, dia voavonjy ho afaka amin’ny fahavaloko.

⁵Toy ny fatotra mangeja ahy ny fahafatesana sady nampitahotra ahy toa riaka mandrava;

⁶toy ny fatotra ahodidina ahy ny fonenan’ny maty, toa harato amandrihana ahy ny fahafatesana.

⁷Tao an-katerena aho no velon-taraina sy niantso vonjy tamin’ny TOMPO Andriamanitro, ka tany an-Tempoliny Izy no nandre ny feoko ary koa nihaino izany antsoantsoko.

⁸Tamin’izay dia nihovitrovitra mafy ny tany; nikorosy ny fanambanin’ny tendrombohitra, ka nihozongozona ireny fa tezitra ny Tompo.

⁹Nisy setroka nidonaka avy teo an’orony ary afo mandevona avy teo am-bavany, ka narahina tselatra mandoro izany.

¹⁰Dia nampiondrika ny lanitra ny Tompo ka nidina; rahona matevina no teo ambany tongony,

¹¹ka toy ny kerobima nitaingenany izany; dia nanidina sy nisosa Izy nahevahevan’ireo elatry ny rivotra.

¹²Tao anaty raho-mainty Izy no niafina ka voahodidina rahona matevina izay ngalingaly toa rano lalina.

¹³Manoloana Azy nisy hazavam-be ary koa rahona nandalo nifanesy niteraka havandra sy afo mitselatra.

¹⁴Tany an-danitra ny TOMPO Avo Indrindra no nampitalakotroka ny varatra sy nampanakoako izany feony;

¹⁵nalefany ny tselatra ka nipariaka toy ny zana-tsipîka nifanaretsaka.

¹⁶Noho ny fandrahonan’ny TOMPO sy fifofofofon’ny fahatezerany[33], dia niseho ny fanambanin’ny ranomasimbe, niharihary ny fanorenan’izao tontolo izao.

¹⁷Avy eny an-danitra ambony Izy no naninji-tanana handray ahy sy nisintona ahy hiala tamin-dranobe;

¹⁸ka afaka aho tamin’ny fahavaloko matanjaka, dia tamin’ireo mpandrafy mahery noho izaho.

¹⁹Tamin’ny androm-pahoriako no nanafika ahy ireo nefa tonga ny TOMPO ka nanohana ahy;

²⁰navoakany ho eo an-kalalahana aho ary nafahany satria tena tiany.

²¹Soa no ataon’ny TOMPO amiko satria marina aho; izany no avaliny ahy satria madio ny toetrako,

²²fa voatandriko ny làlan’ny TOMPO ary tsy ivadihako ilay Andriamanitro;

²³ankatoaviko avokoa ny fitsipiny ary tsy mba ialako ireo didiny.

²⁴Koa tsy manan-tsiny aminy aho fa nitandrin-tena tsy ho diso.

²⁵Eny, soa tokoa no navalin’ny TOMPO ahy satria marina aho sy hitany madio toetra.

²⁶Tompo ô, mahatoky Ianao amin’izay matoky Anao; tsy manan-tsiny koa Ianao amin’izay tsy manan-tsiny;

²⁷Madio Ianao amin’izay madio, miolakolaka kosa amin’izay mpiolikolika.

²⁸Ianao mihitsy no mamonjy ny vahoaka ory, fa mampitanondrika an’ireo mpiavonavona.

²⁹TOMPO Andriamanitro ô, jiro mirehitra ho ahy Ianao ka manazava izany haiziko.

³⁰Noho Ianao Andriamanitro, na hady aza itsambikinako, na manda aza ihoarako.

³¹Mpitarika tonga lafatra Andriamanitra; azo antoka ny torohevitra omen’ny TOMPO. Toy ny ampinga fiarovana Izy ho an’izay rehetra mialoka aminy.

³²Fa iza moa no Andriamanitra afa-tsy ny TOMPO ihany? Ary iza no vatolampy ho anay afa-tsy ilay Andriamanitray?

³³Izy no manome hery ahy sy mampahomby izay ataoko;

³⁴ataony kinga toy ny gazela aho ary ajorony amin’ny toerana avo[34];

³⁵Izy no manofana ahy ho havanana amin’ny ady ka ahaizako manenjana tsipîka varahina.

³⁶Ny tananao ankavanana no manohana ahy, Tompo ô; toy ny ampingako Ianao ka miaro sy mamonjy ahy; mamaly ny antsoko Ianao ary koa manandratra ahy[35].

³⁷Ataonao faingam-pandeha kokoa aho, nefa ny hato-tongotro tsy hangozohozo.

³⁸Manenji-pahavalo aho ka mahatratra azy, ary tsy miverina raha tsy efa ringako izy.

³⁹Montsaniko ireo ka tsy tafarina ary dia mitsitra ambany tongotro[36].

⁴⁰Omenao hery hoenti-miady tokoa aho, ka adabokao ho ambaniko ny mpamely ahy.

⁴¹Ataonao mandositra ahy ny fahavaloko ary aringako ireo mpankahala ahy.

⁴²Miantsoantso izy fa tsy misy mamonjy; ny TOMPO no antsoiny fa tsy mamaly azy.

⁴³Kosehiko toa vovoka entin-drivotra ireny; hoseko toy ny fotaka eny an-dalam-be[37].

⁴⁴Afahanao amin’ny vahoaka mpikomy aho ary apetrakao ho filohan’ireo firenena; ka olona tsy fantatro akory no indreo manjary manompo ahy.

⁴⁵Teny kely no ataoko, dia ekeny aho; vahiny no tonga mila sitraka amiko.

⁴⁶Mikoy izy ireo ka mangovitra no miala ny manda fiarovany.

⁴⁷Velona ny TOMPO! Isaorana ny Vatolampiko. Hasandratra anie Andriamanitra mpamonjiko!

⁴⁸Izy no manao ny famaliana ho ahy ary mampanaiky firenena hofeheziko.

⁴⁹TOMPO ô, afahanao amin’ny fahavaloko aho; eny, ataonao resiko ireo mpamely ahy ary tsy mahazo ahy ny mpanao an-keriny.

⁵⁰Koa eo anivom-pirenena no hiderako Anao sady hankalazako ny anaranao amin-kira[38].

⁵¹Ny Tompo manome fandresena lehibe ho an’ilay mpanjaka voafidiny ary maneho fitia amin’ilay nohosorany[39], dia i Davida sy ireo taranany hatrany amin’ny mandrakizay.