Read Dikateny Iombonana Eto Madagasikara Salamo 2 Bible Online

Salamo 2 - Dikateny Iombonana Eto Madagasikara bible

Salamo 2

¹Nahoana no mihotakotaka ny firenena[2]? Ireo vahoaka mikomy amin’ny tsinontsinona;

²ireo mpanjakan’ny tany miomana hiady; ireo andriana miara-mioko hanohitra ny TOMPO sy ilay Mesiany.

³«Aoka hotapahintsika, hoy ireo, ny gadra angejàny; ary hariantsika any izay fanjakazakàny!»

⁴Ny Tompo Izay mipetraka any an-danitra kosa dia mihomehy azy sy maneso azy.

⁵Ka itenenany amin-katezerana ireo sy ampihorohoroiny amin-kavinirana hoe:

⁶«Izaho no manendry Azy ho mpanjaka eo Tsiôna tendrombohitro masina!»

⁷— Aoka hambarako, hoy ilay mpanjaka, ny didy navoakan’ny TOMPO; fa hoy Izy tamiko: «Ianao no zanako; Rainao niteraka anao Aho manomboka anio[3].

⁸Koa angataho amiko ny firenena rehetra, dia homeko ho fanananao ireny hatrany amin’ny faravazan-tany,

⁹ary hofehezinao amin’ny tehim-by ka ho azonao potehina toa vilany tany[4].»

¹⁰Koa misehoa ho hendry, ianareo mpanjaka; ary minoa anatra, ry mpitsara ny tany.

¹¹Tompoy amin-tahotra ny TOMPO ary ekeo amin-kovitra ny fahefàny, fandrao hirehitra tampoka ny hatezerany ka ho fatin’ny fikasanareo ianareo. Sambatra izay rehetra mialoka aminy.