Read Dikateny Iombonana Eto Madagasikara Salamo 20 Bible Online

Salamo 20 - Dikateny Iombonana Eto Madagasikara bible

Salamo 20

¹Tao amin’ny tahirin-kiran’ny filohan’antoko-mpihira. Salamo nataon’i Davida.

²Hovalian’ny TOMPO vavaka amin’ny andro mahory anie ianao, harovan’ilay Andriamanitr’i Jakôba,

³handefasany vonjy avy ao an-toeramasiny ary hotohanany avy ao Tsiôna!

⁴Hotsaroany anie ny fanatitrao rehetra ary hankasitrahiny ny sorona doranao! Fiatoana

⁵Homeny anao anie izay zavatra irînao ary hotanterahiny izay rehetra kasainao!

⁶Dia hanaovanay fihobiana ny fandresena ho azonao; ary hahofahofanay ny faneva ho voninahitry ny Andriamanitsika. Eny, hotanterahin’ny TOMPO anie izay rehetra angatahinao aminy!

⁷Fantatro izao ankehitriny fa ny TOMPO manome fandresena ny mpanjaka nohosorany; avy any an-danitra toeramasiny no amaliany ny vavaka ataony, ka ny herin’ny tanany ankavanana no anolorany fandresena ho azy.

⁸Ny an’ny sasany, ny kalesiny no itokiany; ny an’ny hafa, ny soavaliny no iankinany; ny anay kosa, ny anaran’ny TOMPO Andriamanitray no hany hery ianteheranay.

⁹Koa ireny mitolefika sy mianjera, fa izahay kosa maharitra mijoro.

¹⁰TOMPO ô, omeo fandresena ny mpanjaka; ary mba valio ny vavaka ataonay amin’ny andro iantsoanay vonjy aminy!