Read Dikateny Iombonana Eto Madagasikara Salamo 21 Bible Online

Salamo 21 - Dikateny Iombonana Eto Madagasikara bible

Salamo 21

¹Tao amin’ny tahirin-kiran’ny filohan’antoko-mpihira. Salamo nataon’i Davida.

²TOMPO ô, ny herinao no ifalian’ny mpanjaka ary ny fandresenao no iravoany aoka izany.

³Nomenao azy izay zavatra nirîny ary tsy nolavinao izay nangatahiny taminao. Fiatoana

⁴Eny, notsenainao fitahian-tsoa izy ka fehiloha volamena no nasatrokao ny lohany;

⁵ny fiainana nangatahiny nomenao azy, dia andro mitandavana mandrakizay.

⁶Noho ny fandresenao dia lehibe ny voninahiny: fiandrianana sy laza no arakotrao azy.

⁷Fa ataonao heni-pitahiana hatrany izy[41] ary ampifalînao amin’ny fanatrehanao.

⁸Eny, ny TOMPO no itokian’ny mpanjaka, hany ka tsy hangozohozo akory izy satria tia azy ilay Avo Indrindra.

⁹Ry Andriamanitra Mpanjaka ô, ho azonao ny fahavalonao rehetra ary ho eo am-pelatananao ireo rehetra mpankahala Anao.

¹⁰Raha vao hiseho fotsiny Ianao, dia ho toy ny afo mijoalajoala handevona azy. — Eny, hofongoran’ny TOMPO amin’ny hatezerany anie ireny tahaka ny andevonan’ny afo ireo zavatra dorana! —

¹¹Hofoananao tsy ho eto an-tany ny taranany, ka hoesorinao tsy ho eo amin’ny olombelona.

¹²Raha mikasa hanisy ratsy anao ireny na mitady hanohitra, dia tsy hahomby;

¹³fa tifirinao amin’ny zana-tsipîka izy ary ataonao rifatra mandositra.

¹⁴Misandrata, TOMPO ô, amin’izato herinao fa hankalazainay an-kira ny fandresenao.