Read Dikateny Iombonana Eto Madagasikara Salamo 24 Bible Online

Salamo 24 - Dikateny Iombonana Eto Madagasikara bible

Salamo 24

¹Salamo nataon’i Davida An’ny TOMPO izao tontolo izao sy izay eo aminy. Azy koa ny tany sy ny mponina ao aminy[51]:

²Izy no nanorina azy teo ambony ranomasina ka mampaharitra azy eo ambonin’ny onja.

³— Iza àry no hiakatra ny tendrombohitry ny TOMPO[52]? Zovy no hahajoro ao amin’ny Toeramasiny?

⁴— Izay madio tanana sy mahitsy fo[53], izay tsy nirona tamin’ny lainga na nianiana hoenti-mamitaka.

⁵Ireo no handray ny fitahian’ny Tompo, sy hoeken’Andriamanitra Mpamonjy ho marina.

⁶Izany no karazan’olona mitady an’Andriamanitra, te hiatrika an’ilay Andriamanitr’i Jakôba! Fiatoana

⁷Akaro ny tataonareo, ry vavahady; misandrata, ry varavarana fahagola, mba hidiran’ny mpanjaka be voninahitra!

⁸— Iza moa izany mpanjaka be voninahitra izany? — Ilay TOMPO mahefa sy mahery, ilay TOMPO mahery an’ady!

⁹Akaro ny tataonareo, ry vavahady; misandrata, ry varavarana fahagola, mba hidiran’ny mpanjaka be voninahitra!

¹⁰— Iza moa izany mpanjaka be voninahitra izany? — Ilay TOMPOn’izao rehetra izao, Izy no mpanjaka be voninahitra! Fiatoana