Read Dikateny Iombonana Eto Madagasikara Salamo 26 Bible Online

Salamo 26 - Dikateny Iombonana Eto Madagasikara bible

Salamo 26

¹Nataon’i Davida. TOMPO ô, ambarao ho tsy manan-tsiny aho fa madio fiaina sy matoky tanteraka ANAO.

²TOMPO ô, fotory toetra sy diniho aho ka tsarao ny faniriako aman’eritreritro.

³Ifantohan’ny masoko ny fitiavanao; ary ny fahamarinanao no arahiko.

⁴Tsy niray tsikombakomba tamin’ny mpisoloky aho na niara-dia tamin’ny mpihatsaravelatsihy;

⁵fa halako ny fikambanan’ny olon-dratsy ary ihatahako lavitra ny olo-meloka.

⁶Hanasa tanana aho satria tsy manan-tsiny. TOMPO ô, hanodidina ny alitaranao aho

⁷ka hiredona hira fisaorana Anao sady hitantara ny asanao mahagaga rehetra.

⁸TOMPO ô, tiako ny trano onenanao, dia ny toerana ipetrahan’ny voninahitrao.

⁹Aza aringana miaraka amin’ny mpanota aho; ny aiko, aza esorina toy ny an’ny mpamono olona,

¹⁰dia ireo mivimbina ody ratsy an-tanan’ila ary ny ilany indray feno tsolotra noraisina.

¹¹Fa izaho kosa dia madio fiaina; koa afaho sy iantrao aho.

¹²Lala-mahitsy no ijoroan’ny tongotro; ka isaky ny miangona aho, dia hisaotra ny TOMPO.