Read Dikateny Iombonana Eto Madagasikara Salamo 27 Bible Online

Salamo 27 - Dikateny Iombonana Eto Madagasikara bible

Salamo 27

¹Nataon’i Davida. Ny TOMPO no mpanazava sy mpamonjy ahy, ka iza no hatahorako? Ny TOMPO no toy ny manda miaro ny aiko, ka iza no hangovitako?

²Raha manatona kosa ny olon-dratsy toy ny biby masiaka hamely ahy, dia ireo fahavalo mandrafy ahy ireo no ho lavo hitsikasina amin’ny tany.

³Raha tafika no tonga hanao fahirano, dia tsy hanan-tahotra akory aho; ary na misy ady mihatra amiko aza, dia handry fahalemana ihany aho.

⁴Zavatra tokana no angatahiko sady irîko fatratra homen’ny TOMPO: dia ny hitoetra ao an-tranony mandritra ny androm-piainako rehetra, mba hianoka amin’ny hatsarampony sy hiandry ny torolalany ao an-tempoliny.

⁵Koa raha tonga ny andro mahory, dia hafeniny ao an’efitra fialofany aho sy hampiereny tokoa ao an-dainy; eny, hasandrany ambony vatolampy aho.

⁶Amin’izay aho dia ho voasandrany tokoa ho ambonin’ireo fahavalo manodidina ahy; ka hanolotra sorom-pihobiana ao an-dainy sady hihira salamo hankalazana ny TOMPO.

⁷TOMPO ô, mba henoy ny feoko raha miantso vonjy aminao, ary iantrao aho ka valio.

⁸«Ndeha ianao, hoy ny foko amiko, ndeha ianao mitady ny TOMPO.» Izany indrindra no itodihako aminao.

⁹Koa aza mihodina amiko Ianao, aza mandroaka ahy an-katezerana, fa Ianao no efa namonjy ahy. Aza arianao aho ary aza ilaozanao, fa Ianao no Andriamanitra mpamonjy ahy.

¹⁰Raha nandao ahy ny ray aman-dreniko, Ianao kosa, TOMPO ô, no nandray ahy.

¹¹TOMPO ô, asehoy ahy ny lalana soritanao; noho ny amin’ireo fahavaloko, dia tariho amin’ny lala-mahitsy aho.

¹²Aza avela hanaram-po amiko ireo mpandrafy ahy, fa vavolombelona mandainga no mitsangan-kamely sy mifofofofo erỳ mba hiampanga ahy.

¹³Inona ny amiko raha tsy natoky aho fa hahita ny hatsarampon’ny TOMPO eto amin’ity tany iainantsika ity?

¹⁴Mahandrasa ny TOMPO ianao! Matanjaha ary mahereza fo; eny, mahandrasa ny TOMPO!