Read Dikateny Iombonana Eto Madagasikara Salamo 29 Bible Online

Salamo 29 - Dikateny Iombonana Eto Madagasikara bible

Salamo 29

¹Salamo nataon’i Davida. Ianareo anjely[57], tolory haja ny TOMPO, eny, tolory haja IZY fa be voninahitra sy hery;

²Atolory AZY ny voninahitry ny anarany, ka dia miankohofa eo anatrehan’ny TOMPO rehefa miseho ny fahamasinany[58].

³Andriamanitra be voninahitra no mampikotrokotroka ny orana; mitrena eny ambony rano ny feon’ny TOMPO: ny TOMPO no manapaka eny ambony ranobe.

⁴Midoboka mafy ny feon’ny TOMPO, satria heni-pahefana sy be fiandrianana IZY.

⁵Mandripaka hazo sedera ny feon’ny TOMPO: eny, ripaky ny TOMPO ireo sederan’i Libano.

⁶Ampitroariny toa zanak’omby ny tendrombohitr’i Libano; ampitroariny toa vantotr’ombimanga ny tendrombohitr’i Hermôna.

⁷Mampitselaka ny tselatra ny feon’ny TOMPO.

⁸Mampihovotra ny taniefitra ny feon’ny TOMPO; eny, ny TOMPO no mampihovotra ny taniefitr’i Kedesa.

⁹Mampangovitra ny ôaka ny feon’ny TOMPO ary mampihintsan-dravina ny ala be. Ny ao an-dapan’ny Tompo samy manao hoe: «Voninahitra anie ho an’Andriamanitra!»

¹⁰Ny TOMPO no mitoetra ho mpifehy na dia ny rano tsy hita faritra aza; mitoetra ho mpanjaka mandrakizay IZY.

¹¹Homen’ny TOMPO hery anie ny vahoakany ka dia hotahîny hombam-piadanana!