Read Dikateny Iombonana Eto Madagasikara Salamo 30 Bible Online

Salamo 30 - Dikateny Iombonana Eto Madagasikara bible

Salamo 30

¹Salamo nataon’i Davida. Hira tamin’ny fitokanana ny lapany.

²TOMPO ô, hankalaza Anao tokoa aho noho Ianao nanafaka ahy tsy ho faty ka tsy namela ahy hoesoim-pahavalo.

³Ry TOMPO Andriamanitro ô, niantso vonjy taminao aho ka dia nositraninao tokoa.

⁴Toa efa lasa tany am-pasana aho fa novelominao indray, TOMPO ô; toa efa tany amin’ny fonenan’ny maty aho no nakarinao avy any.

⁵Mihirà salamo ho an’ny TOMPO, ianareo mpivavaka aminy; manaova fiderana Azy ka tsarovy fa masina Izy.

⁶Indray mipi-maso ny hatezerany, fa mandritra ny fiainana tontolo no itosahan’ny fanambinany. Hariva sy mandraka alina mbola misy ny tomany; fa maraina kosa dia hobim-pifaliana.

⁷Tamin’ny fiadanako no nilazako hoe: «Tsy hihontsona aho na oviana na oviana.

⁸Noho ny fanambinanao, TOMPO ô, dia najoronao tamin-toerana avo aho.» Kanjo tsy nanaiky hijery ahy Ianao ka indro raiki-tahotra mafy aho.

⁹TOMPO ô, miantso vonjy aminao aho; Ianao, ry Tompoko, no italahoako.

¹⁰Inona no soa azonao raha maty aho na aidina halevina any am-pasana? Izay lasa vovoka ve hidera Anao na afaka hanambara fa mahatoky Ianao?

¹¹TOMPO ô, henoy aho ka iantrao; TOMPO ô, aoka hamonjy ahy Ianao!

¹²Dia navadikao ho dihy ny alaheloko. Nesorinao tamiko ny fitafiam-pisaonako ka nosoloanao akanjom-pifaliana.

¹³Izany no tsy hitsaharako ny hisaotra Anao eram-po. Ry TOMPO Andriamanitro ô, hoderaiko mandrakizay Ianao.