Read Dikateny Iombonana Eto Madagasikara Salamo 31 Bible Online

Salamo 31 - Dikateny Iombonana Eto Madagasikara bible

Salamo 31

¹Tao amin’ny tahirin-kiran’ny filohan’antoko-mpihira. Salamo nataon’i Davida.

²TOMPO ô, Ianao no fialofako; tsy ho diso fanantenana na oviana na oviana aho. Araka ny fahamarinanao dia afaho amin’ny loza aho!

³Mba anongilano sofina aho ka vonjeo faingana; aoka Ianao ho Vatolampy fiereko ary ho manda hahitako famonjena!

⁴Eny, harambato sy manda fiarovana ho ahy Ianao[59]; ary mba ho voninahitry ny anaranao, dia aoka Ianao hitarika ahy sy hiandry ahy!

⁵Tsoahy amin’ny fandrika harato izay novelarina tamiko aho, satria Ianao no miaro ahy.

⁶Eo an-tananao no apetrako ny fiainako[60]; TOMPO ô, Ianao no nanafaka ahy, Ianao Ilay Andriamanitra mahatoky.

⁷Halako ny mivavaka amin’ny sampy; fa izaho, TOMPO ô, dia mitoky aminao.

⁸Te hifaly sy hiravo aho noho ny fitiavanao, satria hitanao ny fahantrako sady fantatrao ny fahoriako;

⁹ary tsy navelanao ho azom-pahavalo aho fa najoronao ho eo an-kalalahana.

¹⁰Mba iantrao aho, TOMPO ô, fa ao an-katerena ny tena amam-panahiko ary jembin’alahelo ny masoko.

¹¹Kikisam-pahoriana ny aiko, lanin-tsentosento ny taonako, ritran’ny heloka vitako ny heriko, ka dia indro maina mbamin’ny taolako.

¹²Mandatsa ahy avokoa ny fahavaloko, eny, na dia ny mpiara-monina amiko aza; ny olom-pantatro koa matahotra ahy, ka mandositra raha mifanena amiko.

¹³Tsy fantatra intsony aho fa hadino toy ny maty sy toy ny zavatra nariana.

¹⁴Efa reko ny besinimaro mifosa ahy ka mampihorohoro hatraiza hatraiza[61]. Mikaon-doha hamely ahy izy sy miray tetika hanala ny aiko.

¹⁵Izaho kosa mitoky aminao, TOMPO ô, ka hoy aho hoe: «Andriamanitro Ianao.»

¹⁶Eo ambany fiahianao ny androm-piainako ka afaho amin’ny fahavalo sy mpanenjika aho.

¹⁷Jereo amin-kamorampo izaho mpanomponao, ka vonjeo satria be fitiavana Ianao.

¹⁸Tsy ho diso fanantenana anie aho, satria miantso vonjy aminao, TOMPO ô; fa aoka ireo ratsy fanahy no ho menatra ka hangina any amin’ny toeran’ny maty!

¹⁹Ataovy moana ireo fa mpandainga sady sahisahy mamely olo-marina amin’avonavona sy fanamavoana.

²⁰Kanefa, Tompo ô, akory ny hamaroan’ny soa atokanao ho an’ireo manaja Anao! Eo imason’ny olona no anaovanao izany ho an’izay mialoka aminao hatrany.

²¹Ampierenao tsara eo anatrehanao Izy mba ho lavitra ny ankaso ataon’olona; Ao an-tranonao no anafenanao azy mba ho lavitra ny mpifosa manangana ady.

²²Hisaorana anie Ianao, TOMPO ô, fa nigagàna tokoa ny fitiavanao ahy fony aho toy ny tanàna voafahirano!

²³Tamin’ny fahatairako no nilazako hoe: «Indro aho voaroaka tsy ho eo imasonao.» Kanjo nohenoinao ny fitalahoako, rehefa niantso vonjy taminao aho.

²⁴Ry mpivavaka rehetra, tiava ny TOMPO satria Izy miaro an’izay mino Azy; fa ireo mpiavonavona kosa dia valiany tsy an’erany izay nataony.

²⁵Ianareo rehetra manantena ny TOMPO, matanjaha sy mahereza.