Read Dikateny Iombonana Eto Madagasikara Salamo 33 Bible Online

Salamo 33 - Dikateny Iombonana Eto Madagasikara bible

Salamo 33

¹Manaova horakora-pihobiana, ry olo-marina, noho ny amin’izay nataon’ny TOMPO; fa tombontsoa ho anareo ny midera Azy, ry olo-mahitsy.

²Miderà ny TOMPO amin’ny lokanga; ka salamo arahim-baliha torifolo no ataovy ho fankalazana Azy[63].

³Mihirà hira vaovao ho Azy. Manaova feon-java-maneno kanto miaraka amin’ny fihobiana.

⁴Fa mahitsy ny tenin’ny TOMPO ka azo antoka avokoa izay ataony.

⁵Ny rariny sy ny hitsiny lalainy; ny fitiavany manenika ny tany.

⁶Nandidy ny TOMPO, dia vita ny lanitra; niteny Izy, dia ary ny planeta sy ny kintana.

⁷Angoniny sy fefeny ny rano an-dranomasina ataony am-pitahirizana azy ny rano lalimbe.

⁸Hatahotra ny TOMPO anie ny tany tontolo; hangovitra eo anatrehany anie ny mponina rehetra ao aminy!

⁹Fa niteny Izy, dia tonga izay voalazany; nandidy Izy, dia nisy avy hatrany ireny.

¹⁰Ny TOMPO maharava ny fikasan’ny firenena ary mahasakana ny hevitry ny vahoaka;

¹¹fa ny fikasan’ny TOMPO no maharitra mandrakizay, ny hevitry ny fony manerana ny taranaka mifandimby.

¹²Sambatra ny firenena manana ny TOMPO ho Andriamanitra; sambatra ny vahoaka nofidiny mba ho Azy manokana.

¹³Avy eny an-danitra ny TOMPO no mitsinjo sy mijery ny olombelona rehetra;

¹⁴Avy eo an-tsezafiandrianany no andinihany ny mponina rehetra etỳ ambonin’ny tany.

¹⁵Mpamorona ny saina amam-piniavana Izy, ka mahalala izay rehetra ataon’ny olona.

¹⁶Raha handresy amin’ny ady ny mpanjaka, dia tsy noho ny hamaroan’ny miaramilany; ary raha afa-doza ny mpiady, dia tsy noho ny haben’ny heriny.

¹⁷Fa ny soavaly tsy azo itokiana hahazoam-pandresena; ary na matanjaka be aza izy, dia tsy mahavonjy ny mpitaingina azy.

¹⁸Tsinjovin’ny TOMPO kosa ireo mpanaja Azy, dia ireo olona miantehitra amin’ny fitiavany,

¹⁹mba hanafaka ny ainy amin’ny fahafatesana sy hamelona azy na dia misy mosary aza.

²⁰Miandry ny TOMPO tokoa isika: famonjena sy fiarovana ho antsika Izy.

²¹Eny, Izy Tompo no ifalian’ny fontsika; masina ny anarany ka itokiantsika.

²²TOMPO ô, ho aminay anie ny fitiavanao araka ny ianteheranay aminao!