Read Dikateny Iombonana Eto Madagasikara Salamo 34 Bible Online

Salamo 34 - Dikateny Iombonana Eto Madagasikara bible

Salamo 34

¹Nataon’i Davida, fony izy nody adala teo anatrehan’i Abimeleka [64], dia noroahiny ka lasa nandeha.

²Hisaotra ny TOMPO lalandava aho ary tsy hitsahatra hidera Azy ny vavako.

³Ny TOMPO no reharehako; koa mifalia, ry mpandefitra, rehefa mandre ny fideràko Azy.

⁴Mankalazà ny TOMPO miaraka amiko ianareo, ary aoka hiara-manandratra ny voninahiny isika.

⁵Nitady ny TOMPO aho, dia novaliany vavaka; ka nafahany avokoa ny tahotro rehetra.

⁶Mijere Azy ianareo, dia aoka ho mirana; ny tavanareo tsy ho safo-kenatra intsony.

⁷Niantso vonjy aho fa olo-mahantra ka nohenoin’ny TOMPO sy novonjeny tamin’izay fahoriako rehetra.

⁸Ny anjelin’ny TOMPO miambina manodidina ny mpanaja an’Andriamanitra ka manafaka azy amin’ny loza.

⁹Andramo sy jereo fa tsara ny TOMPO[65]. Sambatra ny olona mialoka aminy!

¹⁰Mankatoava ny TOMPO, ianareo vahoakany: fa tsy misy mahory ny mpankatò Azy.

¹¹Na dia ireo mpanankarena aza, mety tsy ampy hanina ka ho noana; fa izay mitady ny TOMPO tsy mba ho orin-java-tsoa.

¹²Avia hihaino ahy ianareo, rey anaka, fa hampianariko hanaja ny TOMPO.

¹³Raha misy olona mankamamy fiainana ka te ho ela velona sy ho sambatra,

¹⁴dia tsy maintsy mitandrina tsy hiteny ratsy ary koa mitandrina tsy hilaza fitaka,

¹⁵hiala amin’ny ratsy ka hanao ny tsara ary haharitra hikatsaka fiadanana.

¹⁶Tsinjovin’ny TOMPO ireo olo-marina ary henoiny hatrany ny antsony.

¹⁷Toherin’ny TOMPO kosa ny mpanao ratsy[66], ka fongorany tsy eo amin’ny tany ny fahatsiarovana azy ireny.

¹⁸Vao miantso vonjy ny olo-marina, dia henoin’ny TOMPO sy afahany tamin’izay fahoriany rehetra.

¹⁹Fa akaikin’ny torotoro fo IZY sady mamonjy ny rera-tsaina.

²⁰Na maro fahoriana aza ny olo-marina, dia afahan’ny TOMPO amin’izany rehetra izany.

²¹Arovan’ny Tompo avokoa ny rantsam-batany ka tsy hisy tapaka na taolana iray aza[67].

²²Ho fatin’ny haratsiany kosa ny olon-dratsy ary hohelohina ny mpankahala olo-marina.

²³Vonjen’ny TOMPO hatrany ny ain’ny mpanompony ary tsy hisy hohelohina izay mialoka aminy.