Read Dikateny Iombonana Eto Madagasikara Salamo 35 Bible Online

Salamo 35 - Dikateny Iombonana Eto Madagasikara bible

Salamo 35

¹Salamo nataon’i Davida. TOMPO ô, tohero izay mpanohitra ahy ary iadio izay miady amiko.

²Raiso ny ampinga kely sy lehibe ka midira an-tsehatra hamonjy ahy.

³Arangarangao ny lefona sy famaky ka sakano ireo mpanenjika ahy; ary lazao ho tokin’aiko ny hoe: «Izaho no ho mpamonjy anao!»

⁴Ho menatra sy ho afa-baràka anie izay olona mitady hahafaty ahy! Hihemotra sy hangaihay anie izay mikasa hanao ratsy ahy!

⁵Aoka ho toy ny akofa aelin-drivotra ireo, rehefa handroaka azy ny anjelin’ny TOMPO;

⁶ary aoka ho maizina sy halama ny lalany, rehefa hanenjika azy ny anjelin’ny TOMPO!

⁷Satria tsy misy antony mitombina akory, dia nanao fandrika hamelezana ahy ireo ka nihady longoa hamandrihana ahy.

⁸Ho voan’ny loza tsy ampoizina anie izy, ka ho tratry ny fandrika nataony ihany sy hianjera amin’ny longoa nohadîny!

⁹Fa ny nataon’ny TOMPO kosa no hifaliako; ary ny amin’ny famonjeny no hiravoravoako.

¹⁰Ny heriko tontolo no hilazako hoe: «TOMPO ô, tsy misy tahaka Anao satria afahanao ny mahantra amin’izay matanjaka noho izy; eny, afahanao ny malahelo amin’izay mandroba azy.»

¹¹Vavolombelona mandainga no mitsangana, ka zavatra tsy fantatro no iampangany ahy.

¹²Valiana ratsy ny soa nataoko, hany ka mila hamoy fo aho.

¹³Raha narary izy ireo, dia nalahelo aho ka nitafy lamba fisaonana ho marik’izany; nampijaly tena tamin’ny fifadian-kanina aho ary koa niondrika hivavaka ho azy,

¹⁴fa toy ny namana na mpiray tampo no fitondràko azy tamin’izany; nanjombona sy valaketraka aho toy ny olona misaona ny reniny.

¹⁵Kanjo nony lavo kosa aho, dia faly ireo sady mivorivory, mivorivory mba hamely ahy; vahiny tsy fantatro akory aza no tsy mitsaha-mivazavaza amiko.

¹⁶Tahaka ny olona mihomehy lavo izy, ka mihidy vazana ho fankahalana ahy.

¹⁷Tompo ô, mbola ho ela ve Ianao no hitazam-potsiny? Ny aiko tokana avoty amin’ny mpamely ahy fa toa liona mierona mihitsy izy ireo;

¹⁸ka eo anivom-bahoakanao tafangona maro no hiderako sy hankalazako Anao.

¹⁹Aza avela hanesoeso ahy ireo mpandrafy tsy an-drariny; aoka tsy hifanao pi-maso ahy ireo mpankahala tsy amin’antony[68]!

²⁰Tsy mba miteny fihavanana izy, fa mamoron-dainga hamelezana an’ireo bonaika eo amin’ny tany.

²¹Nitsaontsaom-bava tamiko izy ka nilaza hoe: «Akorinao izay! Ny masonay no nahita ny nataonao!»

²²Nefa Ianao, TOMPO ô, dia nahita izay niseho; koa aza mangina, aza manalavitra ahy.

²³Ry Andriamanitro sady Tompoko, mifohaza sy midira an-tsehatra Ianao mba hanome rariny ahy ary koa mba hiaro ny zoko.

²⁴TOMPO Andriamanitro ô, marina Ianao ka ambarao ho tsy manan-tsiny aho, fa aza avelanao ho fanesom-pahavaloko.

²⁵Aoka izy tsy hiteny anakampo hoe: «Hià! Azonay izy, ka nataonay teli-moka!»

²⁶Ho menatra sy hangaihay avokoa anie izay olona mifaly amin’ny fahavoazako; ho safo-kenatra sy ho afa-baràka anie ireo manandra-tena mirehareha amiko!

²⁷Fa izay tia ny hahazoako rariny dia aoka hanao horakora-pifaliana sy ho falifaly hivolan-dava hoe: «Lehibe tokoa ny TOMPO, fa ny hiadanan’ny mpanompony no zavatra tiany!»

²⁸Izaho koa hankalaza ny fahamarinanao sy hidera Anao isan’andro isan’andro.