Read Dikateny Iombonana Eto Madagasikara Salamo 39 Bible Online

Salamo 39 - Dikateny Iombonana Eto Madagasikara bible

Salamo 39

¹Tao amin’ny tahirin-kiran’i Jedotòna, filohan’antoko-mpihira. Salamo nataon’i Davida[73].

²Hoy aho hoe: «Hotandremako ny fitondrantenako mba tsy hanota amin’ny teniko aho. Hataoko toy ny tampina ny vavako, raha mbola eo anatrehako ny olon-dratsy.»

³Koa tena nangina mihitsy aho, tsy nivolana na dia tsy nahasoa aza. Vao mainka nitombo ny fijaliako,

⁴nandevilevy ny foko tato anatiko, toy ny doran’ny afo ny eritreritro, ka tamin’ny farany aho nahateny hoe[74]:

⁵TOMPO ô, ampahafantaro ahy rahoviana no hifarana ny fiainako ary hafiriana sisa no ahavelomako; aoka ho fantatro fa mihelina aho!

⁶Indro fohy dia fohy tokoa ny androm-piainako; ka ny fisiako toy ny tsinontsinona eo anatrehanao. Eny, ny olona rehetra matanjaka aza dia toa tsio-drivotra mandalo; Fiatoana

⁷eny tokoa fa ny olombelona dia toa aloka miserana ihany! Misahirana tsy misy antony izy, manangon-karena nefa tsy mahalala izay hanjary ho tompon’izany.

⁸Ary ankehitriny, Tompo ô, inona no azoko andrasana? Ianao ihany no antenaiko.

⁹Afaho amin’izay rehetra mpamadika ahy aho, aza avela ho fanakòran’ireo adala.

¹⁰Koa mangina aho ary tsy miloa-bava, satria Ianao no nahatonga izao[75].

¹¹Nefa aza kapohinao intsony aho, fa mila ho faty noho ny famelezanao.

¹²Raha manitsy ny olona Ianao ka manafay azy noho ny helony, dia manimba izay maminy indrindra toy ny zavatra lanin’ny kalalao. Eny tokoa fa ny olona rehetra dia toa tsio-drivotra mandalo. Fiatoana

¹³TOMPO ô, henoy ny vavaka ataoko ary mandrenesa ny fitarainako; aza odian-tsy hita ny ranomasoko fa olona nasaina aho no eto aminao, mpivahiny ihany toy ny razako rehetra.

¹⁴Mba ampiatoy ny famaizanao hahazoako mitsiky indray, alohan’ny hahalasanako ho any amin’ny varo-tsy mifody.