Read Dikateny Iombonana Eto Madagasikara Salamo 41 Bible Online

Salamo 41 - Dikateny Iombonana Eto Madagasikara bible

Salamo 41

¹Tao amin’ny tahirin-kiran’ny filohan’antoko-mpihira. Salamo nataon’i Davida.

²Sambatra izay miahy ny malahelo sy mahantra, fa ny TOMPO hamonjy azy amin’ny andro mahory.

³Ny TOMPO no miaro azy tsy ho faty ka mahatonga azy ho sambatra eto an-tany sady tsy mahafoy azy ho voatanam-pahavalo.

⁴Ny TOMPO no hanohana azy eo am-pandriana ijaliany, ka dia hikarakara azy mandritra ny aharariany.

⁵Ka hoy aho tamin’ny TOMPO: «Mba iantrao aho ka sitrano fa taminao no efa nanotako!»

⁶Ny fahavaloko maniry loza ho ahy hoe: «Oviana no ho faty io, ka tsy hotsaroana intsony!»

⁷Raha misy tonga mamangy ahy ireo, dia mikendry ny hanendrikendrika ahy; manangona fanaratsiana ao an-tsainy izy, ka vao tafavoaka, dia mampiely izany.

⁸Nivory ireo rehetra tsy tia ahy mba hitakoritsidritsika ny amiko sy hanombantombana ny fahavoazako.

⁹Hoy ireo hoe: «Voan’ny aretin-dratsy io ka milamaka tsy ho tafarina intsony!»

¹⁰Na dia ny sakaiza tiako indrindra aza, izay nitokiako ka niara-nihinana tamiko, dia nanjary nitsangana hanohitra ahy[77].

¹¹Fa Ianao kosa, TOMPO ô, miantrà ahy; ka areno aho mba hamaliako an’ireo.

¹²Izao no hahafantarako fa tia ahy Ianao: tsy hakorain’ny fahavaloko hoe resy aho.

¹³Ary izaho dia hotahirizinao tsy hanan-tsiny ka hampitoerinao mandrakizay eo anatrehanao.

¹⁴Hisaorana anie ny TOMPO Andriamanitr’i Israely, hatrizay hatrizay ka ho mandrakizay. Amen! Amen[78]!