Read Dikateny Iombonana Eto Madagasikara Salamo 42 Bible Online

Salamo 42 - Dikateny Iombonana Eto Madagasikara bible

Salamo 42

¹Tao amin’ny tahirin-kiran’ny filohan’antoko-mpihira. Tononkalo fananarana nataon’ny terak’i Kôra[79].

²Tahaka ny diera maniry ranovelona no aniriako Anao, Andriamanitra ô.

³Mangetaheta an’Andriamanitra aho, dia ilay Andriamanitra velona. Rahoviana aho no hiditra an-tempoliny mba ho afaka hiseho eo anatrehany?

⁴Ranomaso no zary sakafoko na andro izany na alina, noho izaho ilazana foana hoe: «Aiza ity Andriamanitrao?»

⁵Hontsa tokoa aho mahatsiaro ny fahiny fony aho niaraka tamin’ny besinimaro nandroso nankao an-tranon’Andriamanitra, ombàn’ny feo fihobiana sy fiderana redonim-bahoaka indray mankalaza.

⁶Nahoana re aho no mitanondrika sy mitoloko toy izao ato anatiko? Aoka Andriamanitra no hitokiako! Eny, mbola hoderaiko hatrany Izy, dia ilay Mpamonjiko sady Andriamanitro!

⁷Tsy hitanondrika foana aho, Tompo ô, fa aleoko mivetsovetso Anao avy atỳ amin’ny faritra iandohan’i Jôrdàna, dia ny tendrombohitra Hermôna sy Mitsehara.

⁸Mitambolimbolina ny ranobe, satria mirohondrohona ny riananao; miantonta toy izany hanafotra ahy avokoa ny onja aman’alondranom-pahoriana alefanao.

⁹Ny TOMPO anie haneho fitia amiko nony andro; izaho kosa, nony alina, hihira sy hidera an’ilay Andriamanitra fototry ny aiko.

¹⁰Ka dia izao no teny lazaiko amin’Andriamanitra Vatolampiko: «Nahoana moa Ianao no nanadino ahy? Nahoana aho no nampahorîn’ny fahavaloko ka manjary miaina mijoretra toy izao?»

¹¹Ny fandatsalatsàny ahy dia toa mahatorotoro ny taolako, noho izaho ilazany foana hoe: «Aiza ity Andriamanitrao?»

¹²Nahoana re aho no mitanondrika sy mitoloko toy izao ato anatiko? Aoka Andriamanitra no hitokiako! Eny, mbola hoderaiko hatrany Izy, dia ilay Mpamonjiko sady Andriamanitro!