Read Dikateny Iombonana Eto Madagasikara Salamo 44 Bible Online

Salamo 44 - Dikateny Iombonana Eto Madagasikara bible

Salamo 44

¹Tao amin’ny tahirin-kiran’ny filohan’antoko-mpihira; tononkalo fananarana nataon’ireo terak’i Kôra[82].

²Andriamanitra ô, ny sofinay no nandre ny razanay no nitantara taminay ireo zava-bitanao fahiny tamin’ny andro fahavelony.

³Norobainao ireo firenen-kafa mba hamponenana ny firenenay; nampahorînao ireo vahoakany mba hanomezan-toerana ny vahoakanao.

⁴Ny nahazoan’ny razanay ity tany ity dia tsy ny sabatra nananany; ny nahazoany fandresena dia tsy ny heriny velively, fa ny herinao nirotsaka an-tsehatra sy ny fanatrehanao azy amim-pitiavana.

⁵Ianao tokoa, ry Andriamanitra Mpanjakako, no manome fandresena an’i Jakôba vahoakanao.

⁶Ianao no anosehanay ny fahavalonay; ny anaranao no anitsakitsahanay ny mpamely anay[83].

⁷Tsy ny tsipîkako no itokiako, tsy ny sabatro no andreseko;

⁸fa Ianao no mamonjy anay amin’ny fahavalonay sy manafo-kenatra ny mpankahala anay.

⁹Ianao Andriamanitra no ankalazainay mandrakariva ary ny voninahitrao no derainay mandrakizay. Fiatoana

¹⁰Kinanjo Ianao nanary sy nanafo-kenatra anay, tsy mandeha miaraka amin’ny tafikay intsony.

¹¹Izahay ataonao mihemotra eo anoloan’ny fahavalonay sy famabon’ny mpankahala anay;

¹²atolotrao azy toa ondry hatao sakafo izahay sy aelinao any amin’ny firenen-kafa.

¹³Ny vahoakanao ataonao varo-boba ka tsy ahazoanao tombony velively.

¹⁴Izahay ataonao fandatsan’ny vahoaka hafa izay mpifanila aminay, zary fanakora sy faneso ho an’ireo firenena manodidina anay;

¹⁵ambentin-dresak’ireo firenen-kafa sy mampihifikifi-doha an’ireo vahoakany[84].

¹⁶Eo anoloako mandrakariva ny fahafaham-baràkako ary manarona ahy ny fangaihaizako,

¹⁷vokatry ny fandatsana sy ny fanarabiana avy amin’ireo fahavalo sy mpisompatra.

¹⁸Mihatra aminay izany rehetra izany, na dia tsy nohadinoinay aza Ianao ary na tsy nivadihanay akory aza ilay fanekempihavananao taminay.

¹⁹Tsy nihemotra hianòtra ny fonay, tsy niala tamin’ny lalanao ny dianay,

²⁰nefa izahay asesikao atỳ an-toeram-bibidia[85] sady saronanao amin’ny haizina mikitroka.

²¹Raha nanadino Anao Andriamanitray izahay na nananty tanana tamin’andriamani-kafa,

²²tsy ho tsinjonao ve izany, Andriamanitra ô, Ianao ilay mahalala ny tsiambaratelon’ny fo?

²³Eny, noho ny aminao no amonoana anay mandrakariva sy iheverana anay ho toy ny ondry fanjedaka[86].

²⁴Mifohaza, Tompo ô! Nahoana Ianao no matory? Miarena Ianao fa aza manary mandrakizay.

²⁵Ahoana Ianao no tsy te hanatrika anay ary manadino ny fahorianay sy ny famoretana anay,

²⁶kanefa mihohoka amin’ny tany izahay sady mifetaka amin’ny tany ny kibonay?

²⁷Koa midira an-tsehatra hamonjy anay, avoty izahay noho ny fitiavanao.