Read Dikateny Iombonana Eto Madagasikara Salamo 45 Bible Online

Salamo 45 - Dikateny Iombonana Eto Madagasikara bible

Salamo 45

¹Tao amin’ny tahirin-kiran’ny filohan’antoko-mpihira. Hampiarahina amin’ny gitara. Tononkalo fananarana nataon’ireo terak’i Kôra. Tononkiram-pitiavana[87].

²Ny foko miboiboika teny soa, ry mpanjaka, raha hambarako ny tononkaloko ho anao. Fomba kanto no hanononako an’izany, tahaka ny soratra voasikotra ambony vato.

³Soa indrindra amin’ny samy olombelona ianao sady mahafinaritra ny teny ambaranao; koa aminao mandrakizay ny fitahian’Andriamanitra.

⁴Ry ilay mpiady mahery fo ô, fehezo amin’ny etra ny sabatrao izay mari-piandrianana sy voninahitrao.

⁵Mitaingena kalesy ianao ka mirosoa hiaro ny hitsiny sy hitandro ny rariny. Loza no hafitsoky ny herinao:

⁶ho lavo eo ambaninao ireo firenena, satria maranitra ny zana-tsipîkanao ka hitsatoka am-pon’ireo fahavalonao.

⁷Ny sezafiandriananao dia tahaka ny an’Andriamanitra ka maharitra mandrakizay mandrakizay; araka ny fahitsiana tokoa no itondranao ny fanjakanao.

⁸Tia rariny sy mpankahala ratsy ianao. Noho izany ilay Andriamanitra Andriamanitrao[88] dia nanokana anao fa tsy ireo namanao ka nanosotra diloilo fifaliana tamin’ny lohanao.

⁹Mamerovero ny fitafianao rehetra fa manitra sahondra sy kanela ary miora; avy ao an-dapanao voaravaka ivoary dia andrenesanao mozika izay ankafizinao.

¹⁰Misy andriambavy iray mitsena anao, dia mpanjakavavy maka toerana eo ankavananao[89] sady miravaka volamena avy any Ôfira.

¹¹Mihainoa, razazavavy, atongilano ny sofinao ary aoka ho tandrinao tsara izao: Aza raharahaina intsony ny firenenao sy ny fianakavian-drainao.

¹²Ny mpanjaka mankatelina ny bikanao, ka iondreho izy fa tomponao.

¹³Ny mpanefoefo avy any Tiro sy ny mpanankarena amin’ny vahoaka dia samy hitondra fanatitra hahazoana sitraka aminao.

¹⁴Mamirapiratra tokoa ilay Andriambavy ombàn’ny firavaka mifaham-bolamena.

¹⁵Manao fitafiana misoratsoratra izy no entina eo amin’ny mpanjaka. Manotrona ny andriambavy koa ireo zazavavy sakaizany izay efa nentina teo aminy:

¹⁶mandroso amim-pifaliana sy haravoana ireo ary miditra ao an-dapan’ny mpanjaka.

¹⁷Ry mpanjaka ô, ny zanakao anie handimby anao eo amin’ny sezafiandrianan’ny razanao, ka hotendrenao ho mpifehy manerana ny tany tontolo!

¹⁸Izaho kosa hampahatsiaro ny lazanao amin’ny taranaka mifandimby; izany no hahatonga ny firenen-kafa hidera anao mandrakizay mandrakizay.