Read Dikateny Iombonana Eto Madagasikara Salamo 5 Bible Online

Salamo 5 - Dikateny Iombonana Eto Madagasikara bible

Salamo 5

¹Tao amin’ny tahirin-kiran’ny filohan’antoko-mpihira. Hampiarahina amin’ny sodina. Salamo nataon’i Davida.

²TOMPO ô, mba henoy re ny teniko; aoka ho tandrinao ny sentom-poko.

³Ry Mpanjakako sy Andriamanitro ô, mandrenesa ny feoko fa miantso Anao aho; Eny, Ianao no ivavahako vao maraina,

⁴ka hohenoinao ny feoko, TOMPO ô. Vao maraina aho dia efa miomana ny horaisinao, ary miandry ny valim-bavaka avy aminao.

⁵Tsy mba Andriamanitra tia ratsy Ianao; ka tsy hitoetra eo aminao ny olon-dratsy,

⁶tsy zakanao ho eo anoloanao ny mpirehareha, halanao ny mpanao ratsy rehetra.

⁷Haringanao ny mpandainga; ary maharikoriko Anao, TOMPO ô, ny mpamitaka sy mpamono olona.

⁸Izaho kosa hiditra ao an-tranonao, satria Ianao efa fatra-pitia ahy; dia hiankohoka amim-panajana manoloana ny Toeramasinao aho.

⁹TOMPO ô, tariho amin’ny fahamarinanao aho noho ny afitsok’ireo olona mitsikilo ahy; ataovy mahitsy eo anatrehako ny lalana asainao alehako.

¹⁰Tsy misy azo ianteherana izay lazain’ireo, sady feno heloka ny ao am-pony; ny lelany toy ny lala-malama, ny tendany toy ny fasa-mitanatana[8].

¹¹Andriamanitra ô, melohy izy; ny fikasany anie hampianjera azy! Roahy izy fa be ota loatra, satria efa nikomy taminao.

¹²Izay rehetra mialoka aminao kosa, aoka hifaly; ireo arovanao, aoka hihoby mandrakizay; ireo tia Anao, aoka hiravoravo aminao!

¹³TOMPO ô, Ianao no mitahy ny olo-marina; ny fanambinanao no toy ny ampinga miaro azy.