Read Dikateny Iombonana Eto Madagasikara Salamo 50 Bible Online

Salamo 50 - Dikateny Iombonana Eto Madagasikara bible

Salamo 50

¹Salamo nataon’i Asafa [99]. Ny TOMPO Andriamanitra Avo Indrindra no miteny ka miantso ny olona eran’ny tany, dia hatreo amin’izay iposahan’ny masoandro ka hatrany amin’izay ilentehany.

²Avy ao Tsiôna, tanàna fatratra tokoa, no amirapiratan’Andriamanitra.

³Tonga ilay Andriamanitray ka tsy hangina Izy fa hiteny. Afo mandevona no mialoha Azy, tafio-drivotra mahery no manodidina Azy.

⁴Nidina avy any ambony Izy mba hitsara ny vahoakany, ka miantso ny tany amana habakabaka hoe:

⁵«Vorio hanketo anoloako ny mpivavaka marina, dia ireo nanao sorona fanekempihavanana tamiko.

⁶Aoka hambaran’ny habakabaka fa marina ny Tompo, sady Izy no ilay Andriamanitra Mpitsara!» Fiatoana

⁷— Ry Israely vahoakako, mandrenesa, fa hiteny aminareo sy hampitandrina anareo Aho, dia Izaho Andriamanitra Andriamanitrareo.

⁸Tsy ireo sorona amam-panatitrareo no aniniako anareo: eo anatrehako mandrakariva ireny rehetra ireny.

⁹Tsy izay ombilahy ao am-balanareo no halaiko na izay osilahy ao am-pahitrareo;

¹⁰fa Ahy avokoa ny biby any an’ala sy ny biby fiompy manerana ny tanety;

¹¹fantatro ny vorona rehetra eny an-tendrombohitra ary Ahy koa ny zava-mihetsiketsika eny an-tsaha.

¹²Raha mba noana Aho, tsy hilaza aminao; satria Ahy ny tontolo sy izay eo aminy.

¹³Nofon’ombilahy angaha no fihinako sa ran’osilahy no fisotroko?

¹⁴Ny fiderana no ataovy sorona ho Ahy Andriamanitrareo; ny voadinareo no efao amiko, fa Izaho no Avo Indrindra.

¹⁵Dia antsoy amin’ny andro mahory Aho, fa hanafaka anareo ka homenareo voninahitra.

¹⁶Fa amin’ny ratsy fanahy kosa dia izao no lazain’Andriamanitra: — Ahoana no itanisanisanareo ny didiko sy itenitenenanareo ny fanekempihavanako,

¹⁷ianareo izay mpankahala anatra sy mpanipy ny teniko any ivoho?

¹⁸Raha tojo mpangalatra ianareo, dia miombona aminy; ny olona mpanitsakitsa-bady no fiarahanareo.

¹⁹Mailaka ianareo raha hanaratsy olona, kinga tokoa raha hiteny fitaka;

²⁰mipetrapetraka ianareo no manebaka namana sy manendrikendrika ny mpiray tampo.

²¹Izany ve no ataonareo ka dia hangina Aho sa heverinareo Aho fa mitovy aminareo? Horeseko lahatra mihitsy ianareo ary ny toetranareo hasehoko eo imasonareo!

²²Koa hevero izany, ry mpanadino Ahy, ndrao viraviraiko tsy hisy hanafaka ianareo.

²³Ny fiderana no sorona anomezam-boninahitra Ahy; ary izay mahitsy fitondrantena no hanehoako ny famonjeko.