Read Dikateny Iombonana Eto Madagasikara Salamo 52 Bible Online

Salamo 52 - Dikateny Iombonana Eto Madagasikara bible

Salamo 52

¹Tao amin’ny tahirin-kiran’ny filohan’antoko-mpihira. Tononkalo fananarana nataon’i Davida,

²fony tonga i Dôega, ilay Edômita, ka nilaza tamin’i Saoly hoe: Nankany an-tranon’i Abimeleka i Davida[103].

³Ahoana ianao no mirehareha amin’ny ratsy, ry ilay mahery mamely ny mpivavaka marina.

⁴Heloka hatrany no saininao; toa hareza maranitra ny lelanao, ka kinga tokoa raha hanendrikendrika;

⁵tsy mba ny tsara no tianao fa ny ratsy, tsy mba ny marina fa ny lainga. Fiatoana

⁶Teny manimba avokoa no maminao, ry mpamitaka.

⁷Andriamanitra kosa no hanongana anao mandrakizay; hisambotra sy hisarika anao hiala ny tranonao Izy ary hanongotra anao amin’ity tany ivelomantsika ity. Fiatoana

⁸Ny olo-marina hahita izany ka hitolagaga ary dia haneso anao sy handatsalatsa hoe:

⁹«Indro ilay lehilahy mpiady, tsy nanao an’Andriamanitra ho heriny fa niantehitra tamin’ny harem-beny, nirehaka tamin’ny haratsiany.»

¹⁰Izaho kosa, ao an-tranon’Andriamanitra, dia toa fototr’ôliva maitso mavana; ny fitiavany no itokiako mandrakizay mandrakizay.

¹¹Tompo ô, hoderaiko hatrany Ianao noho ny amin’izay nataonao; ary eo anatrehan’ny mpivavaka aminao no hanambarako fa tsara Ianao.