Read Dikateny Iombonana Eto Madagasikara Salamo 53 Bible Online

Salamo 53 - Dikateny Iombonana Eto Madagasikara bible

Salamo 53

¹Tao amin’ny tahirin-kiran’ny filohan’antoko-mpihira. Hohiraina amin’ny fomba fihira malahelohelo. Tononkalo fananarana nataon’i Davida.

²Adala izay miteny anakampo hoe: «Tsy misy Andriamanitra[104]!» Maneho toetra lo sy maharikoriko ireo sady tsy mba misy manao ny tsara.

³Avy eny an-danitra eny Andriamanitra no miondrika hijery ny olombelona, hizaha sao mba misy olon-kendry izay mitady Azy tokoa.

⁴Fa Izy rehetra no mania, ka samy tsy valahara avokoa; tsy mba misy manao ny tsara, na dia iray akory aza[105]!

⁵Hoy kosa Andriamanitra hoe: «Tena tsy mahalala mihitsy ny mpanao ratsy rehetra fa fitsentsefana ny vahoakako no ataony foto-pivelomana sady Izaho tsy antsoiny akory!»

⁶Indreo matahotra dia matahotra ireny amin’ny tsy tokony hatahorany akory, satria efa naelin’Andriamanitra ny taolan’ny tsy mpivavaka. Ho menatra tokoa izy ireo satria efa narian’Andriamanitra.

⁷Hivoaka avy ao Tsiôna anie ny famonjena an’i Israely, ka hifaly sy hiravo ny taranak’i Jakôba, dia ny vahoaka Israely tsivakivolo, rehefa hambinin’Andriamanitra indray izy[106]!