Read Dikateny Iombonana Eto Madagasikara Salamo 58 Bible Online

Salamo 58 - Dikateny Iombonana Eto Madagasikara bible

Salamo 58

¹Tao amin’ny tahirin-kiran’ny filohan’antoko-mpihira. Hohiraina araka ny feon’ny hoe «Aza ravana....» Salamo nataon’i Davida.

²Moa dia ny rariny tokoa ve no lazainareo, ry manampahefana[112]? Moa araka ny hitsiny ve no itsaranareo ny olona?

³Tsy izany, fa minia manao ny ratsy ianareo; ny herisetra ataonareo no afafinareo amin’ity tany ity.

⁴Hatrany am-bohòka ny olon-dratsy no mivoana; hatramin’ny vao teraka ny mpandainga no maniasia.

⁵Misy poizina tahaka ny menarana izy; manentsin-tadîny tahaka ny bibilava marenina

⁶izay tsy mihaino ny mpanao safosiaka azy, na dia ny mahasondriana indrindra aza.

⁷Andriamanitra ô, torotoroy ao am-bavany ny nifiny; TOMPO ô, montsany ny vangin’ireo zary liona ireo.

⁸Hihanaka toa rano abosasaka anie izy, hadisadisa toa ahitra voahosihosy;

⁹ho tahaka ny lelosy anie izy, ka hiempo eny am-pandehanana; ho tahaka ny zaza tsy tonga volana ka tsy hahita masoandro na oviana na oviana!

¹⁰Tsy mbola tonga kirihitra akory ny tsilo novolen’ny olon-dratsy, dia hongotan’ny tafiotra sahady na mbola maitso na efa maina.

¹¹Ny olo-marina hifaly hahita ny famaliana ny mpanota sy hanasa tongotra amin’ny ran’ireo olon-dratsy.

¹²Amin’izay ny besinimaro hiaiky hoe: «Eny, valisoa no anjaran’ny olomarina; eny, misy Andriamanitra mitsara eto an-tany.»