Read Dikateny Iombonana Eto Madagasikara Salamo 59 Bible Online

Salamo 59 - Dikateny Iombonana Eto Madagasikara bible

Salamo 59

¹Tao amin’ny tahirin-kiran’ny filohan’antoko-mpihira. Hohiraina araka ny feon’ny hoe «Aza ravana...». Hira malefaka nataon’i Davida, fony i Saoly naniraka hiambina ny tranon’i Davida mba hamonoany azy[113].

²Andriamanitra ô, afaho amin’ny fahavaloko aho, arovy tsy ho voan’ireo mpamely ahy.

³Afaho amin’ny mpanao ratsy aho, vonjeo tsy ho azon’ny mpandatsa-dra.

⁴Indreo izy miery ka mikendry hahafaty ahy; olo-matanjaka no mivorivory hamely ahy, kanefa tsy meloka aho na nanota, TOMPO ô;

⁵tsy misy hadisoana vitako velively, kanefa milomay izy mivonon-kijoko ahy.

⁶Ianao TOMPO Andriamanitr’izao rehetra izao sady Andriamanitr’i Israely ô, mifohaza, tongava atỳ amiko ka jereo; mifohaza hanasazy ny mpanompo sampy, aza misy iantrana ireo mpivadika ratsy ireo. Fiatoana

⁷Nony hariva, dia mitampody ny fahavaloko ka toa andian’alika mivovò mihaodihaody eran’ny tanàna.

⁸Injao fa midaondaom-bava izy, ka ny teniny toy ny sabatra; heveriny fa tsy misy mandre azy.

⁹Kanjo Ianao, TOMPO ô, homehy azy; esoinao ny mpanompo sampy rehetra!

¹⁰Ry Heriko ô, Ianao no andrandraiko satria Andriamanitra fiarovana avo ho ahy.

¹¹Ilay Andriamanitra fatra-pitia ahy dia ho avy tokoa hialoha ahy ka hataony hitako ny fahavaloko resy.

¹²Andriamanitra ô, aza aringana avy hatrany ireo fandrao hadinon’ny vahoakako ny fandresenao; ahofokofohy amin’ny herinao ireo ka azerao, ry Tompo ampinganay ô.

¹³Vao miteny izy, dia manota aminao; koa ataovy voafandriky ny avonavony sy tratry ny ozona aman-dainga tanisainy.

¹⁴Aringano an-katezerana izy, aringano ka aza avela hisy hiangana; dia ho fantatra hatrany am-paran’ny tany fa Andriamanitra no mifehy eo amin’ny taranak’i Jakôba. Fiatoana

¹⁵Nony hariva, dia mitampody ireo fahavaloko ka toa andian’alika mivovò mihaodihaody eran’ny tanàna

¹⁶sady miriorio mitady hanina; ka raha tsy voky izy, dia maneronerona.

¹⁷Izaho kosa hihira ny herinao sy hihoby vao maraina ny fitiavanao, satria Ianao fiarovana avo ho ahy sady fialofana amin’ny andro fahoriana.

¹⁸Ry Heriko ô, mankalaza Anao amin-tsalamo aho satria Ianao Andriamanitra fiarovana avo ho ahy, dia ilay Andriamanitra fatra-pitia ahy.