Read Dikateny Iombonana Eto Madagasikara Salamo 6 Bible Online

Salamo 6 - Dikateny Iombonana Eto Madagasikara bible

Salamo 6

¹Tao amin’ny tahirin-kiran’ny filohan’antoko-mpihira. Hampiarahina amin’ny valiha torifolo[9]. Salamo nataon’i Davida.

²TOMPO ô, tezitra amiko Ianao nefa aza faizina aho; vinitra amiko Ianao nefa aza sazîna aho[10].

³TOMPO ô, iantrao aho fa reraka; TOMPO ô, sitrano fa lany hery[11].

⁴Mangorohoro aoka izany aho; fa Ianao kosa re, TOMPO ô, aza mampiandry ahy ela loatra!

⁵TOMPO ô, miverena hanafaka ahy, vonjeo aho noho ny fitiavanao.

⁶Fa ny maty tsy hahatsiaro Anao; any amin’ny fonenany, tsy hisy hidera Anao.

⁷Trotraky ny sento aho; ka isan’alina dia kotsan’ny tomaniko ny fandriako ary vonton-dranomaso ny kidoroko.

⁸Jembin’ny alahelo tokoa ireto masoko, efa pahina noho ny ataon’ny fahavaloko.

⁹Mialà amiko ianareo rehetra mpanao ratsy[12], satria efa ren’ny TOMPO ny fitomaniako.

¹⁰Eny, ren’ny TOMPO tokoa ny tarainako ary noraisiny ny vavaka nataoko.

¹¹Aoka ho menatra avokoa ny fahavaloko; ho azon’ny horohoro izaitsizy anie ireo ka hiverina ilalana, feno henatra tampoka!