Read Dikateny Iombonana Eto Madagasikara Salamo 60 Bible Online

Salamo 60 - Dikateny Iombonana Eto Madagasikara bible

Salamo 60

¹Tao amin’ny tahirin-kiran’ny filohan’antoko-mpihira. Hampiarahina amin’ny gitara. Hira malefaka fahatsiarovana, nataon’i Davida ho fampianarana.

²Tsiahivin’i Davida etoana ny nanafihany an’ireo Sirianina tany Mezôpôtamia sy tany Tsôbà; rehefa nody kosa, dia noresen’i Jôaba ny tafika edômita nisy miaramila 12 000[114].

³Andriamanitra ô, narianao sy nahahakao izahay; kanefa na tezitra aza Ianao, dia velombelomy izahay.

⁴Nohozongozoninao ny tany ka nitresaka; amboary re izy fa nisy nihotsaka.

⁵Nataonao nahita ny mafy ilay vahoakanao ary nampisotroinao divay mahafanina[115].

⁶Faneva manainga handositra no natsanganao mba ho lavitra ny tsipîka ireo mpanaja Anao. Fiatoana

⁷Vonjeo amin’ny herinao izahay ary valio vavaka, dia ho afaka fa vahoaka malalanao.

⁸Ao an-Toeramasiny no niteny Andriamanitra hoe: «Faly tokoa Aho fa hizara an’i Sekema sy ny lohasahan’i Sokôta ho an’ny vahoakako;

⁹Ahy i Gilehada, Ahy koa i Manase; i Efraîma no toy ny fiaro lohako; i Joda no toy ny tehim-piandrianako.

¹⁰I Môaba hampiasaiko toy ny tavy fisasàko; i Edôma hanipazako kapa ho fananako; i Filistia hanaovako horakora-pandresena[116].»

¹¹Iza no hampiditra ahy ho eo anivon’i Edôma? Zovy no hitondra ahy ho ao amin’ilay tanàna mafy?

¹²Moa tsy Ianao ihany ve, Andriamanitra ô? Kanefa izahay efa narianao mihitsy ary ny tafikay tsy iarahanao intsony.

¹³Ampio re izahay hiady amin’ilay mpandrafy, fa tsy mankaiza ny famonjena ataon’ny olona.

¹⁴Andriamanitra no hahazoanay fahombiazana goavana, satria Izy no hanitsakitsaka ireo mpandrafy anay[117].