Read Dikateny Iombonana Eto Madagasikara Salamo 65 Bible Online

Salamo 65 - Dikateny Iombonana Eto Madagasikara bible

Salamo 65

¹Tao amin’ny tahirin-kiran’ny filohan’antoko-mpihira. Salamo nataon’i Davida. Tononkira.

²Ry Andriamanitra monina ao Tsiôna ô, mendrika hoderaina Ianao sy hanefana ny voady natao.

³Satria mpihaino vavaka Ianao, dia hatonin’ny olona rehetra

⁴samy vesaran’ny heloka vitany. Ny hadisoanay tsy zakanay; Ianao kosa no mikosoka azy.

⁵Sambatra ny olona izay voafidinao ka asainao honina ao an-kianjanao! Hamoky anay ny zava-tsoan’ny tranonao, dia ny zava-masin’ny tempolinao.

⁶Manasoa anay tokoa Ianao, ry Andriamanitra Mpamonjy anay; ka dia zava-mampitolagaga no amalianao ny vavakay, ry hany fanantenan’ny vahoaka hatrany am-paran’ny tany rehetra mbamin’ireo nosy any lavitra any.

⁷Tompo ô, tanjaka sy hery no asehonao, ka ataonao miorina mafy ny vohitra,

⁸tonenao ny riaka misamboaravoara sy ireto onjany mirohondrohona, ampangininao ny firenena mitabataba.

⁹Noho ireo famantarana ataonao, dia mitolagaga ny vahoaka hatrany am-paran’ny tany; na tatsinanana na tandrefana dia entaninao hihorakoraka hihoby.

¹⁰Tompo ô, miahy ny tany Ianao, manondraka azy amin’ora-mikija ka mahatonga azy ho vokatra tokoa. Ilay reniranonao[124], Andriamanitra ô, dia tondraka midibadiba hatrany. Vary ho an’ny olona no omaninao ka toy izao no fikolokoloanao ny tany:

¹¹ny soritr’asa ataonao ampo-drano ny bainga motahinao sy aravonao; oram-batravatra no amontosanao azy ka ombànao fitahiana ny tsirim-bary.

¹²Dia zava-tsoa no toa fehiloha izay asatrokao ny taona; ka fahavokarana mitafotafo no amin’izay andalovanao.

¹³Maitso mavana ny ahitra an-tanety, ka feno fifaliana ny havoana;

¹⁴Rakotra ondry aman’osy ny tanimbilona, ary voasarom-bary ny lohasaha ka manako ny hoby sy ny hira ho Anao.