Read Dikateny Iombonana Eto Madagasikara Salamo 66 Bible Online

Salamo 66 - Dikateny Iombonana Eto Madagasikara bible

Salamo 66

¹Tononkira tao amin’ny tahirin-kiran’ny filohan’antoko-mpihira. Salamo. Mihobia an’Andriamanitra, ry mponina eran-tany.

²Ihirao salamo Izy satria be voninahitra. Tolory voninahitra Izy amin’ny fiderànareo.

³Lazao amin’Andriamanitra hoe: «Endrey mampitolagaga ny asanao! Lehibe dia lehibe tokoa ity herinao, ka indro fa ikoizan’ny fahavalonao.

⁴Hiankohoka aminao anie ny mponina eran-tany, sy hihira salamo ho Anao Andriamanitra, eny, hihira salamo ho fanajana Anao!» Fiatoana

⁵Tongava hizaha ny asan’Andriamanitra; mitolagaga ny olombelona amin’ity ataony:

⁶ny ranomasina novany ho tany maina, nitan’ny razanay an-tongotra ny ony[125]. Aoka hifaliantsika eto izany asany izany!

⁷Mahery Izy ka mifehy mandrakizay; arahiny maso ny firenena isan-tokony ka ny mpikomy dia tsy ho afa-mitraka. Fiatoana

⁸Rey vahoaka, isaory ilay Andriamanitray, ataovy maredona ny fiderana Azy,

⁹satria Izy no mahavelona aina anay; tsy navelany ho solafa-mamindra izahay.

¹⁰Nozahanao toetra izahay, Andriamanitra ô, nosedrainao toa volafotsy anaty memy,

¹¹nampidirinao am-pandrika sy novesaranao fitsapana.

¹²Olon-dratsy no navelanao hanosihosy anay; izahay dia voatery namaky afo sy rano, kanjo nafahanao ihany sy nampahazoinao aina.

¹³Koa mitondra sorona eto an-tranonao aho hanefako ny voady nataoko taminao,

¹⁴dia izay voady notononiko fony izaho tao an-katerena.

¹⁵Biby matavy no atolotro hodorana, ombilahy sy ondrilahy ary osilahy, ka dia handraraka tsara ny etony. Fiatoana

¹⁶Ianareo mpanaja an’Andriamanitra, tongava daholo mba hihaino fa hotantaraiko izay nataony tamiko.

¹⁷Vao nanomboka niantso Azy aho, dia fiderana sahady no nambarako.

¹⁸Raha heloka no mamiko ka tsy nifonako, dia tsy ho nihaino ahy akory ny Tompo.

¹⁹Kanefa nihaino Andriamanitra, tena reny tokoa ny fivavako.

²⁰Hisaorana anie Andriamanitra, fa tsy mba nolaviny ny fivavako ary tsy nalany tamiko ny fitiavany!