Read Dikateny Iombonana Eto Madagasikara Salamo 69 Bible Online

Salamo 69 - Dikateny Iombonana Eto Madagasikara bible

Salamo 69

¹Tao amin’ny tahirin-kiran’ny filohan’antoko-mpihira. Hampiarahina amin’ny gitara. Salamo nataon’i Davida.

²Andriamanitra ô, mba vonjeo aho, fa efa mby hatenda ny rano;

³Milentika amin’ny fota-mandrevo aho sady tsy mahita izay hifaharana; tonga amin’ny rano lalina aho ary efa indaosin’ny riaka.

⁴Sasatry ny miantso vonjy aho; ka maina ny tendako, vizana ny masoko, eo am-piandrasako Anao Andriamanitro.

⁵Ireo mpankahala ahy tsy amin’antony[134] dia maro kokoa noho ny volon-dohako; mahery ireo mitady hahafaty ahy, dia ireo mpandrafy ahy tsy an-drariny. Zavatra izay tsy nalaiko no indro asainy averiko.

⁶Andriamanitra ô, fantatrao ny hadalàko; ny hadisoako tsy mba miafina aminao.

⁷Ry Tompo ANDRIAMANITR’izao rehetra izao ô, aoka tsy ho menatra noho ny amiko ireo olona miantehitra aminao; aoka tsy hangaihay noho ny amiko ireo mitady Anao, ry Andriamanitr’i Israely!

⁸Noho Ianao no izakako latsa sy mahasafo-kenatra ny tavako,

⁹ka nanjary olon-kafa sy vahiny aho ho an’ireo mpiray tampo amiko.

¹⁰Ny fitiavako an’ilay tranonao dia mandoro ahy toy ny afo[135]. Ny latsa natao hihatra aminao no mifotitra atỳ amiko[136].

¹¹Mietry tena sady mifady hanina aho, kanefa dia andatsana ahy izany.

¹²Fitafiam-pisaonana no nanaovako, dia tonga fanarabin’ny olona aho

¹³sy fitafan’ny mpitorovoka eo am-bavahady ary koa fikalon’ny mpidoroka.

¹⁴Izaho kosa mivavaka aminao, TOMPO ô, satria fotoam-panambinanao izao; Andriamanitra ô, be fitiavana Ianao, ka valio aho fa azo antoka ny famonjenao.

¹⁵Afaho aho mba tsy ho difotry ny fotaka na hindaosin’ny tafio-drivotra sy ny rano lalina;

¹⁶aoka aho tsy ho safotry ny riaka na koa ho voatelin’ny hantsana na ho voahidin’ny fasana ao anatiny!

¹⁷TOMPO ô, valio aho fa soa ny fitiavanao; todiho aho fa be fiantrana Ianao.

¹⁸Aza minia tsy hijery ahy mpanomponao; azom-pahoriana aho, ka valio faingana.

¹⁹Tongava eto akaikiko Ianao hiandraikitra ahy, ka afaho amin’ny fahavaloko aho.

²⁰Latsa, henatra, fahafaham-baràka: fantatrao fa mihatra amiko avokoa ireny; tsy misy takona Anao ny mpandrafy ahy.

²¹Torotoron-datsa ny foko ka reraka aho: niandry mpitsetra fa tsy nisy, nitady mpampionona fa tsy nahita.

²²Ny sakafoko nasian’ny sasany poizina; mangetaheta aho, ampisotroiny vinaingitra[137].

²³Ho fandrika ho an’ny fahavaloko anie ny sakafony ary ho tonga hahavoa azy ny sorom-pihavanana hohaniny!

²⁴Hojambena anie ny masony ka tsy hahita, hanjary manjoko lalandava anie izy[138]!

²⁵Ny fisafoahanao atosahy aminy; ary enga anie hahatratra azy ny firehitry ny haviniranao!

²⁶Aoka ho rava ny tobiny ary tsy hisy mpitoetra ny lainy[139],

²⁷satria ilay nokapohinao no mbola enjehiny ary ny ferin’ilay noratrainao no ampiany!

²⁸Ho voatahiry an-tsoratra avokoa anie ny heloka vitan’ireo fahavaloko, ka tsy hisy hoekenao ho marina izy!

²⁹Koseho ny anarany ao amin’ilay horonamboky mirakitra ny lisitr’ireo hanana ny fiainana[140]; aoka izy tsy ho voasoratra ho anisan’ny olo-marina!

³⁰Izaho kosa dia ory sy mijaly, Andriamanitra ô, ka ny famonjenao anie no hampahery ahy;

³¹dia hidera ny anaranao amin-kira aho sy hankalaza Anao amin-tsaotra.

³²Fa izany, TOMPO ô, no sitrakao noho ny ombilahy na ny vantotr’omby ary tandroka sy kitro[141].

³³Hahita ny famonjena ahy ny ory ka ho faly. Ry mpitady an’Andriamanitra, ho ela velona anie ianareo!

³⁴Satria ny mahantra henoin’ny TOMPO ary ny olony voagadra tsy mba ariany.

³⁵Miderà Azy, ry tany aman-danitra mbamin’ny ranomasina sy izay velona ao.

³⁶Fa Andriamanitra hamonjy an’i Tsiôna sady hanangana ireo tanànan’i Joda, ka hitoetra ao ny olony sady ho tompon-toerana;

³⁷ireo taranaky ny mpanompon’Andriamanitra no ho tonga mpandova izany; ary izay tia ny anarany no hiorim-ponenana ao.