Read Dikateny Iombonana Eto Madagasikara Salamo 7 Bible Online

Salamo 7 - Dikateny Iombonana Eto Madagasikara bible

Salamo 7

¹Fitarainana nataon’i Davida. Nohirainy teo anatrehan’ny TOMPO noho ny amin’i Kosy ilay Benjaminita.

²TOMPO Andriamanitro ô, Ianao no fialofako. Mba vonjeo re aho ary afaho amin’izay rehetra manenjika ahy.

³Raha tsy izany, dia hamiravira ahy tahaka ny fanaon’ny liona izy, ka tsy hisy hanafaka na hanaisotra ahy eny aminy.

⁴TOMPO Andriamanitro ô, raha nahavita izany anaratsiany ahy izany aho, raha nanao heloka ny tanako,

⁵raha namaly ratsy ny mpanasoa ahy aho na nandroba an’ireo mpampahory izay mandrafy ahy tsy amin’antony,

⁶dia aoka ny fahavaloko hanenjika ahy ka hahatratra ahy! Aoka hohoseny an-tany mbola velona aho[13], ka hotarihiny am-bovoka ny hajako! Fiatoana

⁷TOMPO ô, mirotsaha an-tsehatra Ianao. Aoka hirehitra tokoa ny fahatezeranao! Tohero ireo fahavaloko misafoaka; mijoroa re Ianao mba hanampy ahy, amin’ny fitsarana marina avoakanao.

⁸Aoka ireo firenena hivory hanotrona Anao; ary makà toerana hanerinerina azy Ianao eo amin’ilay sezafiandriananao.

⁹TOMPO ô, Ianao no mpitsara ireo firenena; koa tsarao aho, ry TOMPO Avo Indrindra, fa tia rariny aho ary tsy manan-tsiny.

¹⁰Ampitsaharo ny haratsian’ireo olon-dratsy, ampioreno mafy kosa izay tia rariny; fa Andriamanitra marina Ianao no mahalala ny ao am-po tsy miloaka[14].

¹¹Ny ampinga miaro ahy dia Andriamanitra, ilay Mpamonjy an’ireo mahitsy fo.

¹²Mpitsara mitandro ny rariny Andriamanitra, ka rahonany mandrakariva ny olon-dratsy.

¹³Koa raha tsy miala amin’ny ratsy ireo, dia handrani-tsabatra Andriamanitra sady hanenjan-tsipîka ka hikendry hamely.

¹⁴Fiadiana mahafaty no omaniny, dia zana-tsipîka mandoro.

¹⁵Indreo kosa ny mpiteti-dratsy: loza no saintsaininy lainga sy fitaka no aterany.

¹⁶Mihady lavaka lalina tokoa izy, nefa izy ihany no mianjera ao.

¹⁷Ny loza nomaniny dia mitsingerina eo an-dohany; ary ny herisetra notetehiny dia miantonta eo an-tampon-dohany.

¹⁸Hidera Anao aho, TOMPO ô, fa mitandro ny rariny Ianao; ary hankalaza ny anaranao amin-kira aho, ry TOMPO Avo Indrindra ô.