Read Dikateny Iombonana Eto Madagasikara Salamo 71 Bible Online

Salamo 71 - Dikateny Iombonana Eto Madagasikara bible

Salamo 71

¹TOMPO ô, Ianao no fialofako ka tsy ho diso fanantenana na oviana na oviana aho!

²Noho ny fahamarinanao dia afaho sy ambeno aho, anongilano sofina ka vonjeo.

³Aoka Ianao ho vatolampy miaro ahy sy ho manda ahitako famonjena[142]! Ianao tokoa no harambato sady toera-mafy ho ahy.

⁴Andriamanitro ô, ambeno re aho mba tsy ho azon’ireo olon-dratsy na ho voatanan’ny olo-meloka mbamin’ny mpanao an-keriny.

⁵Fa Ianao no fanantenàko, ry Tompo ANDRIANANAHARY ô; Ianao no itokiako hatry ny fahakeliko.

⁶Vao teraka aho, dia niantehitra taminao; mbola tany am-bohòka aho, efa mpiaro ahy Ianao. Ianao lalandava no fidèrako.

⁷Toa zava-mahagaga ho an’ny maro aho, kanefa Ianao no fialofa-mafy ho ahy.

⁸Ho feno fiderana Anao anie ny vavako ary ho feno fankalazana Anao isan’andro.

⁹Aza arianao aho, nony antitra; aza afoy, rehefa lany hery.

¹⁰Fa miresaka ahy ny fahavaloko, miara-mioko mikendry ny hahafaty ahy.

¹¹Hoy ireo hoe: «Nafoin’Andriamanitra io ka enjeho; sambory fa tsy misy mpanafaka.»

¹²Andriamanitro ô, aza manalavitra ahy; Andriamanitra ô, faingàna re hamonjy.

¹³Ho menatra sy ho afa-baràka anie ireo olona mpiampanga ahy; ho voatevateva sy ho very haja anie ireo olona mitady hanisy ratsy ahy!

¹⁴Izaho kosa hanantena Anao lalandava, ary hampitombo ny fiderana Anao;

¹⁵isan’andro no hitanisan’ny vavako ny fahamarinanao sy ny famonjenao, na tsy voaisako avokoa aza ireny.

¹⁶Tompo ANDRIANANAHARY ô, hiditra ao an-tranonao aho, satria Ianao nirotsaka an-tsehatra nomba ahy; ary dia ny fahamarinanao irery no hotsahiviko.

¹⁷Hatry ny fony aho mbola tanora no efa nampianarinao, Andriamanitra ô; ary mandraka izao dia tsy mitsahatra manambara ireo asanao mahagaga.

¹⁸Antitra sy fotsy volo aho ankehitriny, nefa aza afoy, Andriamanitra ô; enga anie aho ho afaka hanambara ny asanao mahery vaika sy mahomby amin’ireo tanora sy ny taranaka manaraka!

¹⁹Ambony dia ambony tokoa ny fahamarinanao, Andriamanitra ô; ary nahavita zava-baventy Ianao! Tsy misy toa Anao, Andriamanitra ô.

²⁰Fahoriana be sady mafy no navelanao hihatra tamiko; kanefa hovelombelominao indray aho, ary hampiakarinao indray ho afaka amin’ny fasana mampihitsoka.

²¹Dia mbola hampionona indray Ianao ary hamerina amiko ny voninahitro.

²²Izaho kosa hidera Anao amim-baliha noho ny toetranao mahatoky, ry Andriamanitro ô, sy hiredona salamo arahin-dokanga ho Anao, ry ilay Masin’i Israely.

²³Eny, hihorakoraka hihoby ho Anao aho sady hankalaza Anao amin-java-maneno, satria efa notsimbininao ny aiko.

²⁴Isan’andro no hitanisako ny fahamarinanao, satria efa menatra sy mangaihay ireo olona nitady hanisy ratsy ahy.