Read Dikateny Iombonana Eto Madagasikara Salamo 77 Bible Online

Salamo 77 - Dikateny Iombonana Eto Madagasikara bible

Salamo 77

¹Tao amin’ny tahirin-kiran’i Jedotòna [156] filohan’antoko-mpihira. Salamo nataon’i Asafa.

²Andriamanitra no antsoiko mba hitarainako; eny, Izy no antsoiko mba hihainoany ahy.

³Ny Tompo no tadiaviko amin’ny andro fahoriako; tsy an-kitsahatra, nony alina, no anandratako tanana any aminy[157], kanefa dia tsy mety mionona ny foko.

⁴Mahatsiaro an’Andriamanitra aho, ka misento; raha vao mieritreritra aho, dia rera-tsaina. Fiatoana

⁵Tsy avelan’ny Tompo hikimpy ny masoko; mitebiteby aho, ary tsy hitako izay holazaina.

⁶Vetsoiko ny andro fahiny, tsaroako ny taona taloha elabe.

⁷Mandinika lalina aho, nony alina, sady mieritreritra ato am-poko; ka ny saiko dia velom-panontaniana hoe:

⁸«Dia hanary anay mandrakizay ve ny Tompo? Tsy hiantra anay intsony ve Izy?

⁹Dia ho lany tokoa ve ny fitiavany anay? Ho tapitra tsy hisy intsony ve ny teniny?

¹⁰Hadinon’Andriamanitra ve ny miantra anay? Nohidiany tanteraka ve ny fony, satria tezitra Izy?» Fiatoana

¹¹Dia hoy aho anakampoko hoe: «Ny mampahararirary ahy dia izao: Tsy manao asa mahery ho anay intsony ilay Andriamanitra Avo Indrindra.»

¹²TOMPO ô, tsaroako izay efa nataonao ary tadidiko ny zava-mahagaga vitanao fahiny.

¹³Mandinika ireo asanao rehetra aho ary mieritreritra ireo zava-dehibe nataonao.

¹⁴Andriamanitra ô, fahamasinana no tanjon’ny lalanao ka tsy misy Andriamanitra lehibe toa Anao.

¹⁵Ianao irery no manao zava-mahagaga; ary nasehonao tamin’ny firenen-kafa ny fahefànao.

¹⁶Ny herinao no nanavotanao ny vahoakanao, dia ny taranak’i Jakôba sy ny taranak’i Jôsefa. Fiatoana

¹⁷Andriamanitra ô, nahita Anao ny ranobe ka raiki-tahotra; eny, nipararetra mbamin’ny fanambanin’ny ranomasina aza.

¹⁸Nandrotsaka oram-be ny rahona, namoaka kotro-baratra ny raho-matevina, ary nifanaretsaka ny zana-tsipîkanao[158].

¹⁹Tamin’ny firohondrohon’ny kotro-baratrao dia nahazava izao rehetra izao ny tselatra, ary nihovotrovotra sy nihorohoro ny tany.

²⁰Nanao lalana tany an-dranomasina Ianao ary sakeli-dalana tany amin’ny rano lalina[159], nefa tsy nisy nahalala ny soritry ny dianao.

²¹Toy ny fitarihana andian’ondry no nitarihanao ny vahoakanao tamin’ny alalan’i Mosesy sy i Aharôna.