Read Dikateny Iombonana Eto Madagasikara Salamo 8 Bible Online

Salamo 8 - Dikateny Iombonana Eto Madagasikara bible

Salamo 8

¹Tao amin’ny tahirin-kiran’ny filohan’antoko-mpihira. Hampiarahina amin’ny jejilava. Salamo nataon’i Davida.

²TOMPO Andriamanitray ô, endrey ny halehiben’ny voninahitrao manerana ny tany tontolo! Nataonao manoatra ny lanitra ny fiandriananao.

³Kanefa ny feon’ny ankizy madinika[15], eny, ny feon’ireo zaza mbola minono aza no anoheranao ny mpandrafy Anao; ary izany dia toy ny manda natsanganao hampanginanao ireo fahavalonao sy izay te hamaly ratsy.

⁴Raha jereko ny lanitra asan-tananao sy ny volana aman-kintana napetrakao eny,

⁵dia mba inona moa ny olombelona no tsarovanao, sy izay zanak’olombelona no karakarainao[16]?

⁶Fa nataonao latsaka kely noho ny anjely izy[17], ka nosatrohanao voninahitra sy fiandrianana;

⁷nampanjakainao amin’ny asan-tananao: nataonao ho eo an-tongony ny zava-drehetra[18],

⁸dia ny omby aman’ondry sy osy mbamin’ny bibidia any an-tsaha,

⁹ny voro-manidina sy ny trondron-dranomasina izay miriaria manaraka ny onjan-driaka.

¹⁰TOMPO Andriamanitray ô, endrey ny halehiben’ny voninahitrao manerana ny tany tontolo!