Read Dikateny Iombonana Eto Madagasikara Salamo 81 Bible Online

Salamo 81 - Dikateny Iombonana Eto Madagasikara bible

Salamo 81

¹Tao amin’ny tahirin-kiran’ny filohan’antoko-mpihira. Hampiarahina amin’ny jejilava. Salamo nataon’i Asafa.

²Manaova hobim-pifaliana ho an’Andriamanitra herintsika, ankalazao ny Andriamanitr’i Jakôba.

³Ingao ny hira, velezo ny amponga, tendreo ny lokanga tsara feo mbamin’ny valiha.

⁴Amin’ny tsinam-bolana sy volam-penomanana, tsofy ny trômpetra ho an’ny andro fetintsika[193],

⁵satria lalàna ho an’ny Israelita izany, didin’ny Andriamanitr’i Jakôba,

⁶fitsipika nataony ho an’ny taranak’i Jôsefa fony Izy namely an’i Ejipta[194]. — Feo tsy fantatro no reko nanao hoe:

⁷«Nesoriko teo an-tsorokareo ny entana; ny tananareo afa-namela ny sobika mavesatra[195].

⁸Fony noporetina ianareo, dia niantso Ahy ka nafahako; novaliako tao anaty kotrokorana ianareo ary nozahako toetra teo amin’ny ranon’i Meribà[196]. Fiatoana

⁹Ry vahoakako, mihainoa fa mampitandrina Aho; satriko hihaino Ahy ianareo, ry Israelita:

¹⁰Aoka tsy hisy andriamani-kafa eo aminareo, aoka ny andriamanitra vahiny tsy hivavahanareo,

¹¹satria Izaho no TOMPO Andriamanitrareo Izay nampiakatra anareo hiala tany Ejipta[197]! Atanatanao ny vavanareo, dia hofenoiko.»

¹²Kanjo ny vahoakako tsy nihaino Ahy, ny Israelita tsy nila Ahy,

¹³koa navelako izy hizotra amin’ny ditran’ny fony sy hanaraka izay tiany hatao.

¹⁴Raha mba nihaino Ahy ny vahoakako, raha mba nanaraka ny torolalako ny Israelita,

¹⁵dia ho nampietreko faingana ireo fahavalony ary ho nofaiziko ireo mpampahory azy.

¹⁶Izay mpankahala ny TOMPO ho nikoy tamiko; ny famaizany azy ho naharitra mandrakizay.

¹⁷Ny Israelita kosa ho nofahanany vary tsara indrindra ary ho novokisany tantely avy amin’ny vatolampy.