Read Dikateny Iombonana Eto Madagasikara Salamo 83 Bible Online

Salamo 83 - Dikateny Iombonana Eto Madagasikara bible

Salamo 83

¹Tononkira. Salamo nataon’i Asafa.

²Andriamanitra ô, aza mangina Ianao, aza mihenahena sy mijanom-potsiny.

³Indreo misafoaka ny fahavalonao ary miandranandrana ny mpankahala Anao.

⁴Mikotrika fiokoana hamelezana ny vahoakanao ireo ary mifandinika hanohitra ny olona arovanao.

⁵Hoy ireo hoe: «Andeha holevonintsika tsy ho firenena izy; dia tsy hotsarovana intsony ny anarana hoe Israely.»

⁶Efa niray tetika tokoa ireo ka nifanaiky hanohitra Anao:

⁷dia ny Edômita sy ny Jismahelita, mbamin’ny Moâbita sy ny Hagirita,

⁸ny Gebalita sy ny Hamônita sy ny Hamalekita, ary ny Filistinina miaraka amin’ny mponina any Tiro[199];

⁹nikambana taminy koa ny Asirianina mba hifarimbona amin’ny taranak’i Lôta[200]. Fiatoana

¹⁰Andriamanitra ô, ataovy tahaka an’i Siserà ireo, ataovy tahaka an’i Siserà sy i Jabîna teo amin’ny renirano Kisôna[201], na ataovy tahaka ny Midianita

¹¹izay naringana tao Haîna-Harôda[202] ka nanjary zeziky ny tanimboly;

¹²ataovy tahaka an’i Hôreba sy i Zeeba ny andriandahiny ary tahaka an’i Zebà sy i Tsalmonà ny lehibeny rehetra[203],

¹³dia ireo olona nilaza hoe: «Andeha halaina ho antsika ilay fonenan’Andriamanitra.»

¹⁴Andriamanitro ô, ataovy fanina izy tahaka ny vovoka atambolin’ny tadio na tahaka ny akofa paohin’ny rivotra.

¹⁵Toy ny afo mandoro ala, toy ny lelafo mandrehitra tendrombohitra

¹⁶no anenjeho azy amin’ny tafio-drivotrao sy ampitahory azy amin’ny rambon-danitrao.

¹⁷Saròny henatra ny tavany mba hitadiavany Anao, TOMPO ô.

¹⁸Aoka ho menatra sy ho raiki-tahotra izy hatrany amin’ny mandrakizay ka hangaihay sy ho ringana!

¹⁹Ary aoka ho fantany fa Ianao ihany no TOMPO, ilay Avo Indrindra, eto ambonin’ny tany tontolo!