Read Dikateny Iombonana Eto Madagasikara Salamo 85 Bible Online

Salamo 85 - Dikateny Iombonana Eto Madagasikara bible

Salamo 85

¹Tao amin’ny tahirin-kiran’ny filohan’antoko-mpihira. Salamo nataon’ny terak’i Kôra[206].

²TOMPO ô, nanehoanao fitia ilay taninao ka nampodînao ny babo tamin’ny terak’i Jakôba.

³Nesorinao ny heloky ny vahoakanao ary navelanao avokoa ny fahotany. Fiatoana

⁴Nofoananao manontolo ny fahatezeranao ka nialanao ny fahaviniranao mirehitra.

⁵Andriamanitra mpamonjy anay ô, mba avereno ho firenena matanjaka izahay, ka atsaharo ny loniloninao aminay.

⁶Ho tezitra aminay mandrakizay ve Ianao ka hampaharitra ny fahaviniranao amin’ny taranaka mifandimby?

⁷Tsy hovelominao indray ve izahay mba hifalianay vahoakanao aminao?

⁸TOMPO ô, asehoy anay ny fitiavanao ka omeo anay ny famonjenao.

⁹Te hihaino izay lazain’Andriamanitra TOMPO aho. Fiadanana tokoa no ampanantenainy ho an’ny vahoakany, dia ireo mpivavaka aminy, raha tsy miverina amin’ny hadalàny intsony ireo.

¹⁰Eny, akaiky an’izay manaja Azy ny famonjeny; hitoetra eto amin’ity tanintsika ity ny voninahiny.

¹¹Tafahaona ny fitiavana sy ny fahamarinana, mifanoroka ny rariny sy ny fiadanana.

¹²Mitrebona avy amin’ny tany ny fahamarinana ary midina avy any an-danitra ny rariny.

¹³Ny TOMPO mihitsy no hanome ny zava-tsoa ka hahavokatra tokoa ny tanintsika;

¹⁴ary handeha eo alohany ny rariny ka hanoritra ny lalan-kodiaviny.