Read Dikateny Iombonana Eto Madagasikara Salamo 88 Bible Online

Salamo 88 - Dikateny Iombonana Eto Madagasikara bible

Salamo 88

¹Tononkira. Salamo nataon’ny terak’i Kôra. Tao amin’ny tahirin-kiran’ny filohan’antoko-mpihira. Hohiraina amin’ny feo malahelohelo. Tononkalo fananarana avy amin’i Hemàna zanakalahin’i Zerà[209].

²Ry TOMPO Andriamanitra mpamonjiko ô, miantso vonjy aminao aho na andro na alina.

³Aoka ho tonga eo anatrehanao ny fivavako; atongilano ny sofinao hihaino ny tarainako.

⁴Eny, tofoky ny fahoriana aho, ary efa ambavahaona ny aiko.

⁵Heverina ho isan’ireo afaka aina izay efa midina mankany am-pasana aho sady tahaka ny olona tsy manan-kery intsony.

⁶Any amin’ny maty no anjara toerako toy ireo faty mitsitra ao am-pasana, izay tsy tsaroanao intsony sady tsy ombàn’ny fiarovanao.

⁷Napetrakao any am-paran’ny lavaka aho, any amin’ny haizina tsy hita noanoa.

⁸Nanindry mafy ahy ny fahatezeranao toy ny onjan-drano nanotofanao ahy. Fiatoana

⁹Nampanalavirinao ahy ireo namako; izaho dia nataonao nankaloiloy azy. Voahidy tao amin’ny fahoriako aho, ka tsy tafavoaka intsony.

¹⁰Jembin’ny alahelo ny masoko. TOMPO ô, miantso vonjy aminao isan’andro aho ka manandra-tanana hivavaka aminao[210].

¹¹Hanao zava-mahagaga ho an’ny maty ve Ianao? Hitsangana indray ve ireny mba hidera Anao? Fiatoana

¹²Ny fitiavanao ve hotantaraina any amin’ny maty ary ny fahamarinanao hovisavisaina any amin’ny toeram-pahaverezana?

¹³Ny zava-mahagaga vitanao ve ho fantatra any amin’ny haizina? Ary ny fitandroanao ny rariny ve ho fantatra any amin’ny tany fanadinoana?

¹⁴Izaho kosa, TOMPO ô, miantso vonjy aminao; vao maraina dia efa eo anatrehanao ny tarainako:

¹⁵TOMPO ô, nahoana no nanary ahy Ianao ka tsy mety mijery ahy akory?

¹⁶Hatramin’ny fahazazàko dia nahantra saika maty aho ary very hevitra dia very hevitra itambesaran’ny fampihorohoroanao.

¹⁷Safotry ny fahatezeranao aho ary reraky ny fampitahoranao;

¹⁸toy ny rano nandifotra ahy isan’andro ireny ka indray nanemitra ahy hatraiza hatraiza.

¹⁹Nampanalavirinao ahy ireo sakaizako ka ny haizina sisa no hany namako.