Read Dikateny Iombonana Eto Madagasikara Salamo 89 Bible Online

Salamo 89 - Dikateny Iombonana Eto Madagasikara bible

Salamo 89

¹Tononkalo fananarana nataon’i Etàna zanakalahin’i Zerà [211].

²Ireo mari-pitiavanao, TOMPO ô, no hohiraiko mandrakizay; ho an’ny taranaka rehetra ho avy no hampahafantarako ny toetranao mahatoky.

³Hambarako fa miorina mandrakizay ny fitiavanao, mamahatra any an-danitra ny toetranao mahatoky.

⁴Fa hoy Ianao hoe: «Nanaovako fanekempihavanana ilay voafidiko, dia i Davida mpanompoko izay nianianako hoe:

⁵Hisy taranakao hajoroko ho mpanjaka hatrany hatrany; amin’ny taona rehetra ho avy no hanorenako ny fiandriananao[212].» Fiatoana

⁶TOMPO ô, aoka hidera Anao ny anjely any an-danitra noho izany zava-mahagaga nataonao izany; aoka hidera Anao ireo amin’ny fivoriany, indrindra koa noho ny toetranao mahatoky!

⁷TOMPO ô, tsy misy tahaka Anao any an-danitra; ary tsy misy mitovy aminao ireo andriamanitra.

⁸Fa Andriamanitra mampitolagaga Ianao eo amin’ny fivorian’ny anjely, ka lehibe sy hajaina kokoa noho ireo rehetra manodidina Anao.

⁹Ry TOMPO Andriamanitr’izao rehetra izao ô, iza moa no mahery toa Anao? Ny toetranao mahatoky no mipariaka manodidina Anao.

¹⁰Ianao no mamolaka ny avonavon’ny ranomasina sy mampangina ny hatezeran’ny onjany.

¹¹Ianao no nahafaty sy nanorotoro an-dRahaba[213]; ary ny herinao mahefa no nentinao hampielezana ny fahavalonao.

¹²Anao ny lanitra, Anao koa ny tany; Ianao no nanorina izao tontolo izao sy izay rehetra mameno azy.

¹³Ianao no namorona ny avaratra sy ny atsimo; mihoby Anao ny tendrombohitra Tabôra sy Hermôna[214].

¹⁴Anao ny hery tsy hay tohaina; azo antoka ny fifehezanao, tsy refesi-mandidy ny fahefànao[215].

¹⁵Rariny sy hitsiny no fototry ny fanjakanao; fitiavana sy toetra mahatoky no mandeha eo alohanao.

¹⁶Sambatra ny vahoaka mahay mankalaza Anao; TOMPO ô, ao anatin’ny hazavanao no hiainany;

¹⁷ny aminao no hifalifaliany isan’andro, ary ny fahamarinanao no hampitraka azy.

¹⁸Ianao no hery lehibe ho anay ary ny fitiavanao no hireharehanay,

¹⁹satria miankina aminao TOMPO ilay mpanjaka ampinganay, miankina aminao izy, ry ilay Masin’i Israely.

²⁰Indray andro dia niteny tamin-tsindrimandry Ianao ka nilaza tamin’ireo mpivavaka aminao hoe: «Nanaiky hanampy sy hanandratra olo-mahery fo iray aho, dia tovolahy anankiray avy tao amin’ny vahoakako.

²¹I Davida mpanompoko no efa hitako ka nohosorako ilo masina ho mpanjaka[216].

²²Ny fiarovako no homba azy ary ny heriko no hampahatanjaka azy.

²³Tsy hahatratra azy ny fahavalo ary tsy hampahory azy ny mpikomy.

²⁴Eo imasony no hanapotehako ny mpanohitra azy ary hamelezako izay mankahala azy.

²⁵Ny toetrako mahatoky sy ny fitiavako no hiaraka aminy ary Izaho no hampitombo ny fahefàny.

²⁶Homeko azy ny fifehezam-panjakana hatramin’ny ranomasina sy ny ony.

²⁷Izy hiantso Ahy hoe: ‹Raiko Ianao, Andriamanitro, Vatolampy mamonjy ahy›,

²⁸Izaho kosa hanao azy ho lahimatoako, sady ambony indrindra amin’ireo mpanjakan’ny tany[217].

²⁹Hitahirizako mandrakizay ny fitiavako izy ary hitazonako izao fanekempihavanako izao:

³⁰Hisy hajoroko ho mpanjaka hatrany ny taranany; ary haharitra toy ny lanitra ny sezafiandrianany.

³¹Raha mahafoy ny lalànako ny taranany ka tsy manaraka ny fitsipiko,

³²raha manevateva ny baiko avy amiko ka tsy mitandrina ny didiko,

³³dia hofaiziko tsorakazo ny fikomiany ary hosazîko kapoka ny heloka vitany;

³⁴kanefa tsy hofoanako ny fitiavako azy ary tsy hivadihako ny toetrako mahatoky.

³⁵Tsy hotsoahako ny fanekempihavanako ary tsy hovako izay nampanantenaiko.

³⁶Efa nanao izao fianianana izao Aho fahiny; tamin’ny fahamasinako no nanaovako izany fa tsy hamitaka velively an’i Davida Aho:

³⁷Hisy hatrany hatrany ny taranany; ary tahaka ny aharetan’ny masoandro no haharetan’ny sezafiandrianany eo anatrehako;

³⁸hitombina hatrany izany, raha mbola eo koa ny volana izay vavolombelona mahatoky eny amin’ny rahona.» Fiatoana

³⁹Saingy narianao sy nolavinao ilay mpanjaka voahosotrao, satria tezitra taminy Ianao.

⁴⁰Nofoananao ilay fanekempihavanana izay nataonao tamin’ity mpanomponao; natsipinao tamin’ny tany ny satroboninahiny ka nolotoinao hahavery fahefana azy.

⁴¹Narodanao ny fefiny rehetra ary noravanao ny màndany.

⁴²Norobain’ny vahiny rehetra mandalo izy, ary lasa fihomehezan’ireo firenena mifanila.

⁴³Nampirisika ny fahavalony Ianao ary nampifaly ny mpifanandrina aminy.

⁴⁴Nataonao tsy nahomby ny fiadian’ilay voahosotrao ary tsy notohananao akory tamin’ny ady izy.

⁴⁵Notapahinao ny tehim-panjakàny ary naonganao ny sezafiandrianany, ka nadabokao ho amin’ny tany.

⁴⁶Nohafohezinao ny androm-pahatanorany ary norakofanao henatra izy. Fiatoana

⁴⁷TOMPO ô, mbola ho ela ve no hiafenanao? Mandra-pahoviana ny fahatezeranao no mbola hirehitra tahaka ny afo?

⁴⁸Tsarovy fa fohy loatra ny fiainako! Toa zava-poana dia zava-poana no naharianao anay olombelona.

⁴⁹Olona iza no velona ka tsy hiharam-pahafatesana, na hahavotra aina tsy voatanan’ny toeran’ny maty? Fiatoana

⁵⁰Tompo ô, nankaiza irony mari-pitiavanao fahiny izay nianiananao marimarina tamin’i Davida?

⁵¹Tompo ô, diniho ny latsa manjo ahy mpanomponao izay itambesaran’ny fanalam-baràkan’ireo vahoaka,

⁵²satria latsain’ny fahavalonao, TOMPO ô, izaho mpanjaka voahosotrao; eny, latsain’ny fahavalonao aho na aiza na aiza andehanako.

⁵³Hisaorana mandrakizay anie ny TOMPO! Amen! Amen!