Read Dikateny Iombonana Eto Madagasikara Salamo 9 Bible Online

Salamo 9 - Dikateny Iombonana Eto Madagasikara bible

Salamo 9

¹Tao amin’ny tahirin-kiran’ny filohan’antoko-mpihira. Hohiraina araka ny feon’ny hoe «Ny fahafatesan-janaka[19].» Salamo nataon’i Davida.

²Hidera Anao amin’ny foko manontolo aho, TOMPO ô, ka hitantara ny zava-mahagaga rehetra nataonao.

³Ho faly sy ravo aminao aho, ry Avo Indrindra ô, ary hankalaza ny anaranao amin’ny zava-maneno.

⁴Miverina ilalana ireo fahavaloko; lavo izy ka ringana teo anoloanao.

⁵Eo ambonin’ilay sezafiandriananao no ipetrahanao ho Mpitsara marina; ka niaro ny zoko Ianao ary nanome rariny ahy.

⁶Norahonanao ny hafa firenena ary naringanao ny olon-dratsy; nokosehinao ny fahatsiarovana azy mba ho levona mandrakizay.

⁷Nifarana hatreo ny amin’ny fahavalonay, satria rava tanteraka izy; efa narodanao ireo tanànany, ka tsy hotsarovana intsony.

⁸Injay ny TOMPO Izay maharitra mandrakizay: mametraka ny sezafiandrianana hitsarany Izy,

⁹ka hitsara izao tontolo izao araka ny rariny sy hanapaka ny firenena araka ny hitsiny.

¹⁰Ny TOMPO no fialofana ho an’ny ampahorîna, eny, fialofana amin’ny andro mahory.

¹¹Aoka hiantehitra aminao ireo mahalala tsara Anao, satria Ianao tsy mba mandao izay mitady Anao, TOMPO ô!

¹²Ankalazao amin’ny zava-maneno ny TOMPO Izay monina ao Tsiôna, ary ambarao amin’ireo firenena ny zava-mahatalanjona nataony;

¹³satria mikaroka ny mpamono olona Izy sady mahatsiaro ireo voavono ho faty sy ny fitarainan’ireo mahantra.

¹⁴Iantrao aho, TOMPO ô, ka jereo ny fahoriako, noho ny afitsoky ny mpankahala ahy; Ianao no misintona ahy ho afaka amin’ny hasomparan’ny fahafatesana.

¹⁵Amin’izay dia hotanisaiko avokoa ireo anton-javatra iderako Anao; ao an-tanànan’i Tsiôna no hiravoako, satria Mpamonjy ahy tokoa Ianao.

¹⁶Ny lavaka izay nohadîny ihany no nianjeran’ireo hafa firenena; ny fandrika harato nafeniny ihany no nahavoasingotra ny tongony[20].

¹⁷Nampahafantatra ny tenany ny TOMPO fony Izy namoaka ny didim-pitsarany: ny fandrika nataon’ny olon-dratsy no indro nahavoa azy ireo. Fiatoana

¹⁸Any amin’ny fonenan’ny maty no aoka hiverenan’ny ratsy fanahy, dia ireo tsy mpivavaka rehetra izay mpanadino an’Andriamanitra!

¹⁹Andriamanitra kosa tsy hanadino na oviana na oviana ny malahelo; ary tsy ho very mandrakizay ny fanantenan’ireo mahantra.

²⁰Mirotsaha an-tsehatra re, TOMPO ô, aza avela hahery noho Ianao ny olona. Enga anie ireo hafa firenena hotsaraina eo anatrehanao!

²¹TOMPO ô, ampitahory ireo: aoka ho fantatry ny hafa firenena fa olombelona fotsiny ihany anie izy!