Read Dikateny Iombonana Eto Madagasikara Salamo 90 Bible Online

Salamo 90 - Dikateny Iombonana Eto Madagasikara bible

Salamo 90

¹Vavak’i Mosesy, olon’Andriamanitra. Tompo ô, fialofanay hatrany hatrany Ianao.

²Fony tsy mbola ary akory ny tendrombohitra, tsy mbola voaforonao ny tany sy izao tontolo izao, dia efa Andriamanitra Ianao hatrizay ka ho mandrakizay.

³Averinao ho vovoka[218] ny olona ka ilazanao hoe: «Miverena amin’izay niavianareo, rey olombelona.»

⁴Fa eo imasonao ny arivo taona dia toy ny andro omaly efa lasana na ora vitsivitsy amin’ny alina[219].

⁵Farananao ny fiainan’ny olona ka mihelina toa torimaso maraina; tahaka ny ahitra maniry izy,

⁶ka mamony sy mandrobona nony maraina, fa malazo sy maina nony hariva.

⁷Lanin’ny fahatezeranao izahay ary tonafan’ny fahaviniranao.

⁸Napetrakao eo anatrehanao ny helokay; na ny fahotanay miafina aza dia hitanao mazava.

⁹Noho ny haviniranao dia lasana ny androm-piainanay, ka indray misento monja dia nifarana ny taonanay.

¹⁰Tsy maharitra afa-tsy fitopolo taona izany, na valopolo taona ho an’izay matanjaka; kanefa hasasarana sy zava-poana no vokany. Mandalo vetivety tokoa izany fiainana ary manidina ho any amin’ny varo-tsy mifody izahay.

¹¹Iza no mahalala ny herin’ny fahatezeranao ary hanaja Anao araka ny fahaviniranao?

¹²Ampahafantaro anay fa voaisa ny andronay mba hahatonga anay hanana fisainana hendry.

¹³TOMPO ô, mandra-pahoviana no mbola hitezeranao anay? Mba itodiho izahay mpanomponao ka amindrao fo.

¹⁴Fenoy ny fitiavanao izahay raha vao maraina, dia hihoby sy hifaly amin’ny andro sisa iainanay.

¹⁵Aoka hampifalînao izahay araka ny andro nampahorînao anay sy araka ny taona nahitanay loza!

¹⁶Ny ataonao aminay anie ho hitanay maso ary ny voninahitrao ho tsapan’ny taranakay!

¹⁷Ry Tompo Andriamanitray ô, aoka ho aminay ny fahamoram-panahinao ka ampahombiazo ny asan’ny tananay; eny, ampahombiazo ny asan’ny tananay.