Read Dikateny Iombonana Eto Madagasikara Ohabolana 11 Bible Online

Ohabolana 11 - Dikateny Iombonana Eto Madagasikara bible

Ohabolana 11

¹Halan’ny TOMPO ireo mizana mandainga; fa ny lanja marina no tiany[36].

²Setrin’ny fiavonavonana ny fahafaham-baràka; fa ao amin’ny manetry tena no misy fahendrena.

³Ny toetra vanona no mitarika ny olo-mahitsy; fa ny haratsiana kosa mandringana ny mpamitaka.

⁴Tsy misy ilana ny harena amin’ny andro fitsarana; fa ny fahamarinana no manafaka amin’ny fahafatesana.

⁵Ny fahamarinan’ny olom-banona manamora ny fiainany; fa ny olon-dratsy kosa verin’ny faharatsiany.

⁶Ny fahamarinan’ny olo-mahitsy manafaka azy; fa voafandriky ny filàn-dratsy kosa ny mpamitaka.

⁷Rehefa maty ny olon-dratsy, dia miara-maty aminy koa ny fanantenany, indrindra fa izay nankininy tamin’ny harena.

⁸Ny olo-marina dia afahana amin’ny tebiteby; fa ny olon-dratsy kosa no hiditra hisolo azy ao.

⁹Ny mpandà an’Andriamanitra dia manimba namana amin’ny teniny; fa ny fahalalana kosa no hanafahana ny olo-marina.

¹⁰Mifaly amin’ny fahombiazan’ny olo-marina ny tanàna, ary velom-pihobiana amin’ny fahafatesan’ny olon-dratsy.

¹¹Ny tsodranon’ireo olo-mahitsy no isandratan’ny tanàna; fa ny tenin’ireo olon-dratsy kosa no aharavany.

¹²Izay manambany ny namany no bado; fa aleon’ny manan-tsaina mangina.

¹³Ny mpanely fanaratsiana no manambara tsiambaratelo; fa ny olo-mahatoky kosa mahay manafin-javatra.

¹⁴Ho very ny vahoaka tsy misy mpitondra; fa raha maro mpanolo-tsaina izy no handry feizay.

¹⁵Izay miantoka ny trosan’ny hafa dia hanenina mafy; milamin-tsaina kosa izay tsy manaiky hanao izany.

¹⁶Ny vehivavy tsara tarehy mahazo haja; ary ny lehilahy mavitrika mahazo harena.

¹⁷Ny olona tsara fanahy dia manasoa tena; fa ny olona masiaka kosa mampahory tena.

¹⁸Karama manodoka no raisin’ny olon-dratsy; fa valisoa azo antoka no an’izay mamafy fahamarinana.

¹⁹Izay mitandro fahamarinana dia ho velona; fa izay mpanaraka ny ratsy kosa ho faty.

²⁰Halan’ny TOMPO ny olona fetsifetsy; fa izay manan-toetra vanona kosa no tiany.

²¹Azo antoka tokoa fa hofaizina ny ratsy fanahy; fa ny taranaky ny marina kosa ho voavonjy.

²²Ny hatsaran-tarehin’ny vehivavy tsy misaina dia toy ny kavim-bolamena eo amin’ny oron-kisoa.

²³Ny soa ihany no kendren’ny olo-marina; fa ny fahatezeran’Andriamanitra[37] kosa no arehitry ny fanirian’ireo olon-dratsy.

²⁴Misy izay malala-tanana nefa mitombo harena hatrany; ary misy kahihitra loatra nefa mihamahantra ihany.

²⁵Hiavosam-panambinana ny olona mpanao soa, ary izay manome rano hosotroina dia ho afa-ketaheta.

²⁶Ozonim-bahoaka izay mitahiry ny variny[38] fa tsofiny rano kosa izay mivarotra ny azy.

²⁷Izay fatra-pikatsaka ny soa dia misarika ny fanambinan’Andriamanitra; fa izay mitady ny ratsy kosa dia hahita loza.

²⁸Hihareraka izay mitoky amin’ny hareny, fa ho tahaka ny ravin-kazo maitso kosa no handrobonan’ny olo-marina.

²⁹Izay mitondra korontana ao an-tranony dia adala, ka handova rivotra sy ho tonga mpanompon’ny hendry.

³⁰Ny vokatry ny fahamarinana dia toy ny hazon’aina; ary ny hendry no mahataona olona.

³¹Omem-balisoa etỳ an-tany ny olo-marina; koa ny ratsy fanahy sy ny mpanota dia vao mainka hahazo ny setry sahaza[39]!