Read Dikateny Iombonana Eto Madagasikara Ohabolana 12 Bible Online

Ohabolana 12 - Dikateny Iombonana Eto Madagasikara bible

Ohabolana 12

¹Izay tia fananarana tia fahalalana; fa adaladala izay mankahala tsikera.

²Ny tsara fanahy dia mahazo sitraka avy amin’ny TOMPO, fa izay manana sain-dratsy kosa helohiny.

³Tsy haratsiam-panahy no maha tafaorina ny olona; fa ny marina kosa mamaka tsy misy mahozongozona.

⁴Satroboninahitry ny vadiny ny vehivavy tsara fanahy, fa homamiadana mikiky azy kosa ny vehivavy tsy mendrika.

⁵Ny olo-marina mihevitra ny rariny; fa ny olon-dratsy kosa misaina fitaka.

⁶Ny tenin’ny olon-dratsy dia fandrika mahafaty; ny lazain’ny olo-marina kosa mamonjy ny hafa.

⁷Raha miongana ny olon-dratsy, dia tsy misy tafajanona; fa ny ankohonan’ny olo-marina kosa maharitra hatrany.

⁸Ny fahaizan’ny olona no hiderana azy, fa izay adaladala kosa hatao tsinontsinona.

⁹Aleo olon-tsotra manana mpanompo anankiray, toy izay mpirehaka ho maro mpanompo nefa tsy manan-kohanina.

¹⁰Ny olo-marina mahalala mitsimbina ny bibiny; fa ny olon-dratsy kosa masiaka hatramin’ny atiny.

¹¹Izay miasa ny taniny ho voky hanina, fa izay manao hevi-dravina kosa tsy ampy saina.

¹²Ny olon-dratsy maniry tombontsoa tsy ara-drariny; fa ny olo-marina kosa mamaka sady mamokatra.

¹³Ny olon-dratsy voafandriky ny laingany ihany; fa ny olo-marina kosa afa-miala amin’ny fahoriana.

¹⁴Ny tenin’ny olona no ahazoany fahombiazana sy andraisany ny vokatr’izay asan’ny tanany.

¹⁵Ny adala dia mihevitra ho mahitsy toetra; fa hendry kosa ny olona izay mandray torohevitra.

¹⁶Ny adala maneho hatezerana eo no ho eo, fa ny hendry alaim-baràka kosa mahatsindry fo.

¹⁷Izay milaza ny marina no manambara ny rariny; fa fitaka kosa no ambaran’ny vavolombelona mandainga.

¹⁸Izay mitsaontsaona dia mety handratra toy ny sabatra; fa ny tenin’ny hendry kosa dia fanasitranana.

¹⁹Ny teny marina dia mitombina hatrany; fa ny lainga kosa dia indray mipi-maso ihany.

²⁰Fitaka no ao am-pon’izay miteti-dratsy; fa fifaliana kosa ho an’izay misaina fihavanana.

²¹Tsy misy ratsy manjo ny olo-marina; fa ny olon-dratsy kosa heniky ny loza.

²²Mankahala ny mpandainga ny TOMPO, fa mankasitraka kosa ny olona mahatoky.

²³Ny olona malina tsy mampideradera ny fahalalàny; fa ny fon’ireo adala kosa mamoaka hafokana.

²⁴Ny olona mazoto miasa no homena fitondrana; fa ny olona kamo kosa dia hampanaovina asa an-terivozona.

²⁵Ny ahiahy mandreraka ny fon’ny olona; fa ny teny soa kosa mahafaly azy.

²⁶Ny olo-marina dia mpitari-dalana ny namany fa ny toetran’ny olon-dratsy kosa mamery azy.

²⁷Ny mpihaza kamo tsy mba manana haza hatono; fa soa sarobidy kosa ny olona mazoto miasa.

²⁸Ny lalan’ny fahamarinana no misy ny fiainana; fa ny lalam-paharatsiana kosa mankany amin’ny fahafatesana[40].