Read Dikateny Iombonana Eto Madagasikara Ohabolana 13 Bible Online

Ohabolana 13 - Dikateny Iombonana Eto Madagasikara bible

Ohabolana 13

¹Ny zanaka hendry mihaino ny anatry ny rainy, fa ny zanaka mpaniratsira kosa mandà fitsikerana.

²Ny olona tsara dia mijinja ny vokatry ny teniny, fa ny mpanao ratsy kosa mivelona amin’ny herisetra.

³Izay mahafehy ny vavany maharo ny ainy; fa izay basivava mandringan-tena.

⁴Ny kamo no mitsiriritra tsy mety afa-po; fa ny mazoto kosa mahazo izay irîny.

⁵Ny olo-marina dia mankahala ny lainga; fa ny olon-dratsy kosa manevateva sy manala baràka.

⁶Ny fahamarinana miaro izay mizotra tsy misy tsiny; fa ny faharatsiana kosa mamery ny mpanota.

⁷Misy miseho ho manankarena nefa tsy manam-bariraiventy; fa misy kosa mody mahantra nefa manana harem-be.

⁸Ny haren’ny olona no antoky ny ainy; fa ny mahantra tsy matahotra fandrahonana.

⁹Ny olo-marina dia toy ny hazavana tsara famiratra; fa ny olon-dratsy kosa dia toy ny jiro efa ho faty.

¹⁰Fifandirana no hany ateraky ny avonavona; fa izay mandray torohevitra kosa no misy fahendrena.

¹¹Ny harena azo amim-pahamaikana dia mihena an-toerana; fa izay manangona izany tsikelikely no mampitombo azy.

¹²Ny fanantenana mihemo-dava dia mankarary fo; fa ny firarian-tsoa tanteraka kosa mampahazo aina.

¹³Mamery tena izay manamavo ny teny; fa hahazo valisoa kosa izay manaja ny didy.

¹⁴Ny fampianaran’ny hendry dia loharanon’aina, mba hialana amin’ny fandriky ny fahafatesana[41].

¹⁵Ahazoan-tsitraka ny fahalalana enti-manasoa, fa ny toetran’ny ratsy fanahy kosa mitratrevatreva.

¹⁶Ny malina rehetra dia miasa amim-pandinihana; fa ny adala kosa mampiseho hafokana.

¹⁷Ny iraka ratsy fanahy dia mampidi-doza; fa ny masoivoho mahatoky kosa manarin-javatra.

¹⁸Hahantra sy ho menatra izay mandà fananarana; fa homem-boninahitra kosa izay mandray tsikera.

¹⁹Fifaliam-panahy ny firarian-tsoa izay tanteraka; maharikoriko ireo adala kosa ny hiala amin’ny ratsy.

²⁰Izay miaraka amin’ny hendry dia hihahendry; fa izay misakaiza amin’ny adala kosa hiharatsy.

²¹Loza no manjohy ny mpanota; fa hasambarana kosa no valisoan’ny olo-marina[42].

²²Ny olona tsara fanahy mamela lova ho an’ny taranany; fa ny haren’ny mpanota kosa voatahiry ho an’ny olo-marina.

²³Ny sahan’ny mahantra izay voaasa dia mahavokatra hanina be; fa ny olona sasany kosa ringana noho ny tsy rariny ataony.

²⁴Izay tsy mba mikapoka an-janany tsy tia azy; fa izay tia azy kosa tsy misalasala manafay azy.

²⁵Ny olo-marina dia mihinana mahalala onona; fa ny kibon’ny olon-dratsy kosa tsy mety afa-po.