Read Dikateny Iombonana Eto Madagasikara Ohabolana 16 Bible Online

Ohabolana 16 - Dikateny Iombonana Eto Madagasikara bible

Ohabolana 16

¹Fikasana no an’ny olombelona fa an’ny TOMPO kosa ny teny farany.

²Ny olona mihevitra ny ataony ho mety avokoa; fa ny TOMPO no mitsara ny toe-panahy manesika azy.

³Ankino amin’ny TOMPO ny asanao, dia ho tanteraka izay kasainao.

⁴Samy misy antony avokoa ny zava-drehetra nataon’ny TOMPO; ka na dia ny ratsy fanahy aza dia nataony ho amin’ny androm-pamaizana.

⁵Halan’ny TOMPO ny olona miavona; azo antoka fa hofaiziny ireny.

⁶Manafa-keloka ny fitiavana sy ny toetra mahatoky; ary ny fanajana ny TOMPO no ialana amin’ny ratsy.

⁷Rehefa sitraky ny TOMPO ny fitondrantenan’ny olona, na dia ny fahavalony aza ampihavaniny aminy.

⁸Aleo manan-kely ombàm-pahamarinana toy izay ny karama be azo amin’ny tsy rariny.

⁹Ny fon’ny olona no maminavina ny hizorany; fa ny TOMPO kosa no mandavorary ny diany.

¹⁰Teny ombàm-pahefàn’Andriamanitra no ambaran’ny mpanjaka; ka tsy mba diso ny didim-pitsarana avoakany.

¹¹Araka ny TOMPO ny mizàna sy lela-mizàna marina; ary asany avokoa ireo vato tsy mandainga ao an-kitapo.

¹²Halan’ny mpanjaka ny fanaovan-dratsy, satria fahamarinana no iorenan’ny sezafiandrianany.

¹³Filazana ny marina no sitraky ny mpanjaka, ary izay miteny mahitsy no tiany.

¹⁴Ny fahatezeran’ny mpanjaka dia iraka mahafaty; fa ny hendry kosa no manao izay hitonian’izany.

¹⁵Raha miran-tava ny mpanjaka, dia mamelombelona aina; ary ny hatsaram-pony dia toa rahona mitondra oram-pararano.

¹⁶Aleo mahazo fahendrena toy izay mahazo volamena, ary aleo mahazo fahaiza-manavaka toy izay volafotsy[47].

¹⁷Ny lalan’ny olo-mahitsy midify ny ratsy; izay mitandrina ny alehany no miaro ny ainy.

¹⁸Ny fiavonavonana mialoha ny faharavana, ary ny fireharehana mialoha ny fahalavoana.

¹⁹Aleo manetry tena miaraka amin’ny olona mahantra toy izay mizara babo miaraka amin’ny mpiavonavona.

²⁰Izay mahay mandini-draharaha no hahita soa; ary izay matoky ny TOMPO no ho sambatra.

²¹Izay hendry fanomban-javatra no atao hoe manan-tsaina; ary ny teny mamy no maharesy lahatra kokoa.

²²Loharanom-piainana ho an’izay manana azy ny fahaizana; fa ny hadalàny ihany no manafay ny adala.

²³Ny hendry mieritreritra aloha vao miteny, ka mahatonga ny teniny haharesy lahatra kokoa.

²⁴Ny teny mamy dia toy ny toho-tantely, ka sady hafinaretam-panahy no fahasalamam-batana.

²⁵Misy toetra heverin’ny olona ho mahitsy kanjo mankany amin’ny fahafatesana no iafarany[48].

²⁶Ny hanoanana no mahatonga ny mpiasa hiasa, satria ny fanirian-kanina no manesika azy.

²⁷Mikotrika faharatsiana ny olon-tsy vanona, ary toa misy afo mandevona eo amin’ny molony.

²⁸Ny mpihatsaravelatsihy manangana ady, ary ny mpanendrikendrika mampisaraka ny mpisakaiza.

²⁹Ny olona lozabe manangoly ny namany, ka mitarika azy ho amin’ny lalan-tsy mahasoa.

³⁰Izay mikimpy maso sy manaikitraiki-molotra dia miteti-dratsy sy mikasa anao izany.

³¹Satroboninahitra marevaka ny volo fotsy; fizorana amam-pahamarinana no ahazoana azy.

³²Ny tena mahery dia izay maharesy ny hatezerany, fa aleo mahafehy tena toy izay mahafehy tanàna.

³³Ahontsankontsana ny kodiakely hahalalan-javatra fa izay mipoitra eo kosa dia avy amin’ny TOMPO[49].